Анаабыр улууһугар “Алмаас” култуура киинигэр үгэс буолбут сылын аайы ыытыллар “Анаабыр үрүҥ түүннэрэ” ырыа күрэҕин бэстибээлэ быйыл 26-с төгүлүн ыытылынна. Сылтан сыл бэстибээл хоту сирдэртэн сылдьар ыччаты түмэр, талааннары киэҥ эйгэҕэ биллэрэр.
Байыаннай эпэрээссийэҕэ сылдьар хотой уолаттарга анаан, хотойдор үҥкүүлэрин “Алмазы Анабара” бөлөх оҕолоро үҥкүү көрдөрөн тэрээһини арыйдылар. Кэнсиэри иилээн-саҕалаан ыыттылар дьоллоох Дьокуускай куораттан ытык мааны ыалдьыттар — стендапер, сценарист, артыыс Олег Румянцев-Үрүмэн уонна стендапер, артыыс, сценарист, режиссер Иннокентий Иванов-Кэш. Быйылгы ырыа күрэҕэ “ИлМактал” эдэр ыччаты түмэр сыаллаах култуурнай — спортивнай бэстибээл иһинэн ыытылынна. Быйылгы бэстибээлгэ Өлөөнтөн, Дьэлиҥдэттэн, Үрүҥ Хайаттан, дьоллоох Дьокуускай куораттан, Красноярскай кыраайтан уонна Сааскылаахтан уопсайа 28 кыттааччы икки түһүмэххэ кыттыыны ылла.
Бастакы түһүмэххэ бэйэлэрин дойдуларын туһунан, эбэтэр хоту сир ааптардарын ырыаларын толордулар. Иккис түһүмэххэ бэйэлэрэ сөбүлээн талбыт ырыаларын ыллаатылар.
Икки күннээх түһүмэҕи сыаналаатылар оройуоннааҕы Оҕо ускуустубатын уһуйар оскуолатын дириэктэрэ, “Анаабыр үрүҥ түүннэрэ — 2017” Гран при кыайыылааҕа Алена Голикова, Үрүҥ Хайа култууратын дьиэтин мелодиһа, элбэх Республиканскай ырыа күрэҕин кыттыылааҕа — кыайыылааҕа Константин Спиридонов, Дьэлиҥдэттэн Светлана Дмитриева “Анаабыр үрүҥ түүннэрэ — 2021” лауреата, Өлөөн оройуонун култуура дьиэтин директора, Саха республикатын туйгуна. Өлөөн оройуонуттан Татьяна Миронова, Өлөөн улууһун оҕо ускуустубатын уһуйар бастыҥ категориялаах учуутала, Саха сирин култууратын туйгуна. Сааскылаахтан Чэмэлиинэ Соктоева — Анаабырдааҕы эдэр ыччат бэлиитикэтин исписэлииһэ, “Анаабыр үрүҥ түүннэрэ 2008 — 2009” бэстибээл лауреата. Афанасий Андросов — СӨ култууратын үтүөлээх үлэһитэ, СӨ ырыа айааччыларын сойууһун чилиэнэ, гражданскай килбиэн бэлиэ кавалера, ”Анаабыр үрүҥ түүннэрэ” уонна “Күн сардаҥалара” бэстибээл төрүттээччитэ, Анаабыр гимнын ааптара, Анаабыр улууһун бочуоттаах олохтооҕо. Дьүүллүүр сүбэ кыттааччылар толорор маастарыстыбаларын, ырыа ис хоһоонун дьоҥҥо тиэрдиилэрин, сценическэй уобарастарын сыаналаатылар.
Ыытааччылар кыттааччыларга кыайыыны баҕаран туран, “Ыччат мустан, ыллаан-туойан, доҕордоһор түһүлгэтин бу икки күҥҥэ өрө көтөҕүллээхтик Анаабырга, Сааскылаахпыт сиригэр, ыччат умнуллубат ырыаларын дуоһуйа истэр дьоллоох киэһэлэрин саҕалаатахпыт буолуохтун” диэн туран, күрэх бастакы түһүмэҕин саҕалаатылар. Саала толору көрөөччүлээх ытыс дохсун тыаһынан доҕуһуолланан, ырыаны ымыы оҥостубут уонна саҥардыы бастакытын кыттар эдэр толорооччулар биир биир тахсан, эт куоластарынан ыллаатылар. Нүөмэрдэр быыстарыгар ыытааччылар көрөөччүлэргэ бириистэрдээх оонньуу оонньоттулар, сүргэлэрин көтөхтүлэр.
Хас биирдии кыттааччы ыллыыр таһыма үрдүгүн, сыанаҕа уобараһы арыйбытын көрөөччү бэлиэтээтэ, биһирээтэ. Иккис күнүгэр дьүүллүүр сүбэ састааба “Анаабыр үрүҥ түүннэрэ” диэн ырыаны ыллаан, иккис түһүмэҕи арыйдылар. Ыытааччынан буоллулар Иннокентий Иванов-Кэш, Олег Румянцев, Сааскылаах кэрэ куолара Алина Бережнева уонна Елена Игнатьева. Бары кыттааччылар айылҕаттан айдарыылаах, ырыа куттаах, кэрэ куоластарынан көрөөччүлэри сөхтөрдүлэр. Дьүүллүүр сүбэ түмүк таһаарыар диэри Константин Спиридонов “Эн биһикки” диэн ырыаны ыллаан иһитиннэрдэ. Култуура киинин салайааччыта Надежда Слепцова тэрийээччилэр ааттарыттан спонсордарга бэстибээлгэ көмөлөспүттэрин иһин махтанна, махтал суруктары уонна сувенирдары туттартаата. Ол курдук махтал суруктары ыллылар:
Анаабыр улууһун баһылыга Эдуард Платонов, Сааскылаах нэһилиэгин баһылыга Алексей Николаев, Үрүҥ Хайа нэһилиэгин баһылыга Егор Спиридонов, “Алмазы Анабара” акционернай уопсастыба генеральнай дириэктэрэ Алексей Окоров, Үрүҥ Хайатааҕы “Хэйро” култуура дьиэтин дириэктэрэ Сергей Сыроватскай, Сааскылаахтааҕы саҥа көлүөнэ киин библиотекатын дириэктэрэ Марфа Боярская, үөрэх управлениетын начальнига Любовь Елисеева, Анаабырдааҕы гимназия оскуолатын дириэктэрэ Валентина Матвеева, Сааскылаах орто оскуолатын дириэктэрэ Августина Свешникова, Үрүҥ Хайа орто оскуолатын дириэктэрэ Суруйаана Неустроева, оҕо ускуустубатын оскуолатын дириэктэрэ Алена Голикова, оҕолору эбии үөрэхтээһин киинин дириэктэрэ Снежанна Им, Анаабырдааҕы эдэр ыччат бэлиитикэтин исписэлииһэ Чэмэлиинэ Соктоева, “Комуслуга” муниципальнай унитарнай тэрилтэ дириэктэрэ Алексей Русланович, Андросов Н.Е аатынан муниципальнай унитарнай тэрилтэ дириэктэрэ Павел Игнатьев, муниципальнай автономнай тэрилтэ дириэктэрэ Степан Спиридонов, “Лидер” хааччахтаммыт эппиэтинэстээх уопсастыба дириэктэрэ Тамара Андреева. Уонна чааһынай урбаанньыт спонсордарга: Аркадий Корякинҥа, Елена Васильеваҕа, Александра Лыткинаҕа, Зоя Захароваҕа, Вера Николаеваҕа, Семен Дмитриевка, Октябрина Стропшаҕа, Василий Игнатьевка, Семен Степановка, Тимур Корякинҥа.
Яна Спиридонова салайыылаах “Анаабыр алмаастара” ансаамбыла оҕолор толорууларыгар “Хотугулуу үҥкүү” көрдөрдүлэр. Үҥкүү кэннэ көрөөччүлэр сөбүлүү истибит ырыаһыттарыгар төлөпүөн нөҥүө куйаар куодунан куолас ыыттылар. Куоластыырга биэс мүнүүтэ бириэмэ бэрилиннэ. Куоластааһын бириэмэтигэр Айталыына Николаева салайыылаах оҕо ускуустубатын оскуолатын оҕолоро Боярская Яна уонна Акакиев Алексей долганскай үҥкүү үҥкүүлээн күөрэттилэр. Дьахталлар кулууптарын бөлөҕө “Аныгылыы үҥкүү” көрдөрдүлэр. Нүөмэрдэр кэннилэриттэн ыытааччылар көрөөччүлэр олорор миэстэлэринэн розыгрыш оонньоттулар. Розыгрыш сүрүн бирииһин — “Электрическэй эт эрийэр массыынаны” сүүйдэ Наталья Васильева. Бэстибээл түмүктэнэр чааһыгар “Үҥкээбил хоһуун” спортивнай күрэх түмүгүн Анаабыр улууһун баһылыга Эдуард Платонов уонна күрэхтэһиини иилээн-саҕалаан ыыппыт сүрүн судьуйа Айсен Семенов кыайыылаахтар ааттарын биллэрдилэр. Ол курдук, үһүс миэстэни ылла Өлөөн — Муома боотура Петров Ян, иккис миэстэ буолла Үрүҥ Хайа саарына Туприн Поохо уонна бастыҥтан бастыҥ буолла Үрүҥ Хайаттан эр бэрдэ Туприн Дьулустан. Кыайыылаахтарга харчынан сэртипикээт туттартаатылар.
Бэстибээл кэтэһиилээх, долгутуулаах чааһа үүннэ. Кыайыылаахтар ааттарын иһитиннэрэ сыанаҕа дьүүллүүр сүбэ таҕыста. Бэстибээли төрүттээччи Афанасий Андросов кыттааччылары эҕэрдэлээтэ: “Икки күннээх тыҥааһыннаах ырыабыт күрэҕин түмүгэр кэллибит, биһиги, дьүүллүүр сүбэ, өр баҕайы сүбэлэһэн-амалаһан кыайыылаахтары уонна номинаннары таһаардыбыт. Уонна бу эдэр кыттааччылары бүгүҥҥү күнүнэн эҕэрдэлиэҕиҥ”, — диэн эттэ. Анал ааттары иҥэрдилэр:
- “Ырыа аргыстаах айанньыт” анал ааты ылла Юрий Николаев, Дьэлиҥдэ
- “Көҥүл ырыаһыт” анал ааты ылла Алексей Большаков, Красноярскай кыраай
- “Бэриниилээх кыттааччы” анал ааты ылла Олеся Туприна, Үрүҥ Хайа
- “Көҥүл ырыаһыт” анал ааты ылла Василий Павлов, Дьэлиҥдэ
- “Кыайыыга дьулуур” анал ааты ылла Семен Николаев, Дьэлиҥдэ
- “Бэстибээл эрэлэ” анал ааты ылла Айза Гаппазова, Үрүҥ Хайа
- “Бэстибээл бэриниилээх ырыаһыта” анал ааты ылла Анастасия Туприна, Сааскылаах
- “Арктика сулуһа” — Лидия Большакова, Красноярскай кыраай
- “Бэстибээл дебюта — 2024” — Нарыйа Туприна, Үрүҥ Хайа
- “Төрөөбүт дойдуга бэринии” — Айыына Борисова, Өлөөн
- “Истиҥ ырыаһыт” — Виталий Протопопов, Дьэлиҥдэ
- “Элээркэй ырыа” — Люция Дмитриева, Өлөөн
- “Бэстибээл дебюта — 2024” — Нарыйа Николаева, Дьэлиҥдэ
- “Дорҕоон куолас” — Рафаэль Иванов, Сааскылаах
- “Дорҕоон куолас” — Мария Семенова, Өлөөн
- “Бэстибээл дебюта — 2024” — Алена Туприна, Үрүҥ Хайа
- “Бастыҥ сценическай таҥас” — Айталыына Бэргэн, Үрүҥ Хайа.
- “Төрөөбүт дойдуга бэринии” — Марфа Егорова, Дьэлиҥдэ.
- “Бэстибээл дебюта — 2024” — Айаана Туприна, Үрүҥ Хайа.
- “Бэстибээл дебюта — 2024” — Милана Максимова, Сааскылаах.
- “Бастыҥ ааптарскай ырыа” — Василий Спиридонов, Үрүҥ Хайа.
Үһүс истиэпэннээх дипломант буолла Арина Оконешникова, Сааскылаах. Иккис истиэпэннээх дипломанынан ааттанна Юрий Ефимов, Өлөөн. Бастакы истиэпэннээх дипломант аатын сүктэ Джамилия Шабданова, Сааскылаах.
Үһүс истиэпэннээх лауреат буолла Снежанна Винокурова, Сааскылаах. Иккис истиэпэннээх лауреат — Егор Николаев, Өлөөн. Бастакы истиэпэннээх лауреатынан ааттанна Катерина Путятина, Сааскылаах.
“Анаабыр үрүҥ түүннэрэ — 2024” бэстибээл кыайыылаах аатын ылла Өлөөнтөн Валерианна Тетерина.
Уонна көрөөччү биһирэбилин ылла Катерина Путятина.
Оройуоннааҕы “Анаабыр үрүҥ түүннэрэ — 2024” ырыа күрэҕэ бэйэтин тула өссө төгүл сомоҕолоон түмтэ. Кэлбит ыалдьыттар бары илии тутуурдаах, өттүк харалаах үөрэн-көтөн, астынан дойдуларыгар төнүннүлэр.
Мария ЯРОЕВА