Сэтинньи 27 күнүгэр оҕо этин-сиинин сайыннарар оскуолатыгар бүтүн Арассыыйатааҕы «Родные — любимые» дьиэ кэргэн пуорумун чэрчитинэн, оҕо уонна ыччат “Бастыҥнар хамсааһыннара” уопсастыбаннай хамсааһын, улуустааҕы дьиэ кэргэн уонна ыччат политикатын управлениетын тэрийиитинэн дьиэ кэргэҥҥэ аналлаах сэргэх тэрээһин буолан ааста.
“Бастакылар хамсааһыннара” бүтүн Арассыыйатааҕы оҕолор уонна ыччаттар уопсастыбаннай-судаарыстыбаннай хамсааһыннара дойду устуоруйатын, норуот култууратын, барҕа баайын харыстыыр, дьиэ кэргэн сыаннастарын өрө тутар сыалтан дойдубут бэрэсидьиэнэ Владимир Владимирович Путин дьаһалынан 2022 сыллаахха тэриллибитэ. Санатан эттэххэ, Сааскылаах орто оскуолатыгар бүтүн Россиятааҕы оҕо хамсааһынын маҥнайгы салаата 2023 сыллаахха ыам ыйын 20 күнүгэр үөрүүлээх быһыыга-майгыга арыллыбыта.
Пуорумҥа бүтүн Арассыыйатааҕы оҕоҕо уонна ыччакка «Бастакылар хамсааһыннара» судаарыстыбаннай-уопсастыбаннай хамсааһынын специалиһа Галина Афанасьевна Бессонова кыттыыны ылла.
Тэрээһин аһыллыан иннинэ Арассыыйа, Саха сирэ уонна Анаабыр гимнэрэ тыаһаата. Аан тылы улуус баһылыгын социальнай боппуруоска солбуйааччы Николай Александрович Андреев эттэ. Оҕо ускуустубатын оскуолатын иитиллээччилэрэ “Гудейко” ансаамбыла долганскайдыы эҕэрдэ үҥкүү көрдөрөн, дьон хараҕын сымнаттылар. “Бастыҥнар хамсааһыннарын”исписэлииһэ Галина Афанасьевна эҕэрдэ тылын эттэ уонна үс күн устата Сааскылаахха үлэлиэхпит диэтэ.
Үөрэх управлениятын салаатын начальнига Любовь Дмитриевна Елисеева оҕо сайдыытыгар сүҥкэн кылааттарын иһин төрөппүттэргэ махтал суруктары туттарда. Ол курдук махтал суруктары туттулар: Андрей Михайлович уонна Юлия Николаевна Токуевтар, Николай Афанасьевич уонна Ирина Алексеевна Оконешниковтар, Гавриил Семенович уонна Розалия Михайловна Толбоновтар, Хрисан Афанасьевич уонна Лилианна Радиевна Назаровтар, Алексей Николаевич уонна Туяра Андреевна Туприннар, Александр Данилович уонна Ирина Германовна Алексеевтар, Вадим Анатольевич уонна Аксиния Егоровна Черепановтар, Петр Михайлович уонна Анастасия Дмитриевна Дьяконовтар, Эдуард Петрович уонна Радмила Арьяновна Платоновтар, Иннокентий Васильевич уонна Елена Николаевна Поповтар, Геннадий Иннокентьевич Спиридонов, Константин Васильевич уонна Октябрина Александровна Стропшалар.
Улуустааҕы гимназия оскуолатын дириэктэрэ Валентина Алексеевна Матвеева пуорум кыттыылаахтарын эҕэрдэлээтэ уонна дьиэ кэргэн, оҕо саас сылларын чэрчитинэн гимназия оскуолатыгар өр кэмҥэ бииргэ үлэлэспит төрөппүттэргэ махталын биллэрдэ.
Эҕэрдэлэр кэннэ пуорум кыттыылаахтарын тренинҥэ ыҥырдылар. Тренинг кэннэ Сааскылаах орто оскуолатын дириэктэрэ Августина Васильевна Свешникова Сааскылаах оҕолорун “Бастакы хамнаныылар” ситиһиилэрин туһунан сырдатта. Тэрээһин кэннэ пуорум кыттыылаахтарын эбии үөрэхтээһин киинэ бэлэмнээбит күндү астаах фуршекка ыҥырдылар.
Салгыы спартакиада буолла. Спартакиадаҕа биэс хамаанда 3 түһүмэххэ күөн көрүстүлэр. Хамаанда састааба икки улахан киһиттэн уонна үс оҕоттон турда. Хамаандалар аат толкуйданан бастакы түһүмэххэ кииристилэр. Бастакы түһүмэх: эстафета, манна хамаандалар мүнүүтэҕэ мэһэйдэри туораан, ыскакаалканан ыстаннылар уонна үс холонуулаах сыал ыттылар. Иккис түһүмэх: саа ботуруонун хомуйуута, манна хамаандаттан биир оҕо уонна биир улахан киһи саа ботуруонун хаатыгар отут устуука буулдьаны ыһан хомуйдулар. Уонна бүтэһик үһүс түһүмэх: викторина, кыттааччыларга боппуруостардаах илиис туттартаатылар, боппуруостарга эппиэттииллэригэр биэс мүнүүтэ анаатылар.
Спартакиада бэрт сэргэхтик ааста. Суудьуйалар баалларын ааҕан таһааран, кыайыылаахтары ааттаатылар. Ол курдук бочуотунай үһүс миэстэни “Харыйалар” хамаанда, иккис миэстэни “Бастыҥнар” хамаанда ыллылар. Кыайыылаах бастакы миэстэ “Анаабыр” хамаандата буолла. Кыайыылаахтары кубоктарынан уонна грамоталарынан эҕэрдэлээтилэр.