Урукку сылларга хоту сир тыйыс тымныы усулуобуйатыгар теплицаҕа оҕуруот аһын сатаан үүннэриллибэт, куурусса, сибиинньэ иитиллибэт, эт-үүт ас оҥоһуллубат диэччилэр. Аны билиҥҥи кэмҥэ кэм уларыйан судаарыстыба да, өрөспүүбүлүкэ да өттүттэн элбэх араас көмө бырагыраамалар буор босхо көрүллэр буолбуттара.
Хотугулуу сытар арктическай оройуоннарга 2023 сылтан тыа хаһаайыстыбатын сайдыытын бырагырааматынан босхо сайаапканан 4 986 куурусса, 245 сибиинньэ уонна 3 219 тонна комбикорм бэриллибитэ. Бу бырагырааманан туһанан баһаартан сэрэтии инструктора Виктория Туприна куурусса иитиитин саҕалаабыта. Барыта холбоон 19 кууруссалаах эбит. Кууруссалар күҥҥэ 9-10 устууканы сымыыттыыллар. Күҥҥэ иккитэ аһыыллар. Аһылыктарыгар балыгы сөбүлээн сииллэр. Битэмииннэри куораттан сакаастыыр. Эрдэ тыа хаһаайыстыбатын үлэтигэр букатын сыһыана суох киһи эбит.
«Куурусса иитиитин олус сөбүлээтим. Элбэх оҕолоох ыалга олус табыгастаах», — диэн бэлиэтээн этэр. Билигин маҕаһыынтан сымыыт атыыласпаттар. Сороххо бэйэлэрэ сымыыт атыылаан эбии дохуот киллэринэллэр.
Сымыыттарын «Сатал» маҕаһыыҥҥа туттараллар эбит. Үксүн билэр дьон тутатына дьиэтиттэн кэлэн атыылаһаллар. Сайын массыына суола суох кэмигэр дьон ордук наадыйар эбит сымыыкка. Виктория куурусса көрүүтүнэн-харайыытынан бэйэтэ дьарыктанар. Уонна орто уола Владик, 4 кылаас үөрэнээччитэ, илии-атах буолан көмөлөһөр.
«Кыһыҥҥы өттүгэр күрээтинньик уотунан ититиллэр буолан ороскуоттаах. Кыһыҥҥы күрээтинньигим кэҥиирэ эбитэ буоллар, кууруссаны 50-ча төбөҕө диэри улаатыннарар баҕа санаалаахпын», — диэн бэйэтин санаатын үллэһиннэ.
Бу Викторияны кытта кэпсэтэн баран, хотугу сир усулуобуйатыгар кууруссаны иитиэххэ сөп эбит диэн санаатым. Маннык тыабыт хаһаайыстыбата сайда турара көрөргө да, истэргэ да олус учугэй.
Сардана АЛЕКСЕЕВА