“Библионочь” аахсыйа чэрчитинэн араас тэрээһиннэр буолан аастылар. Ол курдук, “Алмаас” култуура киинин саҥа көлүөнэ библиотекатыгар “Супер шеф” диэн ааттаах маастар кылаас буолан ааста.
Тэрээһиҥҥэ эр дьон кыттыыны ыллылар. Араас ингредиеннартан бэркэ астаан көрдөрдүлэр. Бастакы кыттааччынан Сааскылаах орто оскуолатын ахсыс кылааһын үөрэнээччитэ буолла. Кини саамай туттуллар, боростуой ингредиеннартан “Бисквит” астаата. Сүрүн бородуукталары — баанкалаах сгущенканы, икки устуука сымыыты, ньуоска төбөтүгэр суоданы уонна үс остолобуой ньуоска мас арыытын кутан, үчүгэйдик буккуйан, хараҕынан көрөн бурдук кутта уонна кытаанах соҕус тиэстэ буолуор диэри мэһийдэ. Эрдэттэн сылыйбыт оһоххо 200 кыраадыска 45 мүнүүтэ буһара уурда. Киһи айаҕар киирэн ууллан хаалар минньигэс буолан таҕыста.
Иккис кыттааччы Владимир Большаков, эрэдээксийэ дириэктэрэ, “Корейскай салаты” олох уратытык астаата. Бу салаакка куурусса филетын кубиктыы кырбаан, туустаах бурдукка булкуйда уонна мас арыытыгыр ыһаарылаата. Креветканы ыраастаан баран эмиэ ыһаарылаан ылла. Икки устуука сибиэһэй помидордаах оҕурсуну кубик аҥаардыыта кырбаата уонна онно биир устуука мандарины эмиэ кубиктыы кырбаан бырахта. Сүрүнэ диэн авокадо фруктата буолла. Бородуукталары барытын булкуйан, үрдүтүгэр соевай соуһу кутта. Владимир маннык тэрээһиҥҥэ сөбүлээн көхтөөхтүк кыттар. Бу иннинэ эмиэ үс араас бүлүүдэ астаан, маастар кылаас көрдөрбүтэ. “Цезарь” салааты, “Карбонара” пастаны уонна “Яблочно-карамельнай” бөрүөгү астаабыта.
Үһүс кыттааччы Гавриил Толбонов буспут соботтон кэтилиэт астаан көрдөрдө. Ууга буспут бэлэм кыра соболору ылан улахан уҥуохтарын барытын ыраастаата, эт эрийэр массыынаҕа эриттэрдэ, ол тахсыбыт фаршынан кэтилиэт оҥортоон, итии хобордооххо мас арыытыгар ыһаарылаан кэбистэ. Сэҥээрэ кэлбит ыалдьыттар бүлүүдэлэри үөрэ амсайдылар.
Библиотека үлэһиттэрэ тэрээһин кыттыылаахтарыгар махтанан тураннар сэмэй бэлэхтэрин туттардылар.
Мария Яроева