Тохсунньу саҥатыгар «Алмаас» култуура киинигэр ытык-мааны аҕам саастаах дьоҥҥо бэртээхэй дьоро киэһэ буолан ааста.
Бу күн мустубут бэтэрээннэргэ анаан итии чэйдээх, сылаас астаах, көр-күлүү, ырыа-тойук аргыстаах бырааһынньыктааҕы «Бал ветеранов» ыытылынна.
Тэрээһин дьоро чаастан саҕаланна. Нэһилиэк баһылыгын солбуйааччыта Туяра Туприна ытык кырдьаҕастары кэлбит Саҥа дьылынан эҕэрдэлээтэ уонна 70 саастарын туолбут үбүлүөйдээхтэргэ эҕэрдэ суруктары уонна сэмэй бэлэхтэри туттартаата. Бэтэрээннэри ыраах тымныы Хоту дойдуттан эҕэрдэлии кэллилэр Тымныы оҕонньор уонна кини сиэнэ Хаарчаана.
Аныгы бэтэрээннэр дьиэ кэргэн эрэ интэриэһинэн олорор буолбакка, кинилэр бу саастарыгар диэри үлэлии-хамныы сылдьаллар, актыыбынай олоҕу тутуһаллар, уопсастыба тэрээһиннэригэр көхтөөхтүк кытталлар.
Бырааһынньык бырагыраамата араас куонкурустан уонна оонньуулартан турда. Кырдьаҕастар бары көрүҥҥэ көхтөөх кыттыыны ыллылар. Саҥа дьыл бастыҥ бэлиэтэ — күөх харыйа тула бырааһынньыктааҕы остуолга олорон бэтэрээннэрбит оҕолор, ыччат кыттыылаах кэнсиэри көрөн, көрдөөх ооньууларга кыттыһан, үөлээннээхтэрин кытта ирэ-хоро кэпсэтэн, эдэр саастарын доҕотторун ортотугар умнуллубат түгэннэрин санаатылар.
Маны таһынан нэһилилиэк администрацията тэрийбит лотереята ыытылынна. Бу дьоро күҥҥэ ытык бэтэрээннэрбит күлэн-үөрэн, оонньоон-көрүлээн бириэмэни сэргэхтик атаардылар, астынан тарҕастылар. Дьоро киэһэ түмүгэр аҕам саастаахтар эдэрдии эрчимнэнэн үҥкүүлээн битийдилэр, 90-с сыллардаах муусукаҕа уйдаран эргийэн тэлээрдилэр. Тэрээһини тэрийбиттэргэ барҕа махталларын тиэртилэр.