Былатыан Ойуунускай аатынан Саха театрын артыыстара уһун тохтобул кэнниттэн үгэс буолбут сааскы гастролларга туруннулар. Быйылгы гастроллар Россияҕа Дьиэ кэргэн, Саха Өрөспүүбүлүкэтигэр Оҕо саас сылыгар ананнылар. Барыта түөрт гастрольнай биригээдэ хотугу улуустары уонна Таатта улууһун хаптылар.
Сааскы гастроллар олунньу 20 күнүттэн Өлөөн, Анаабыр улуустарыгар СӨ үтүөлээх артыыһа Дьулустаан Семенов салалтатынан саҕаланнылар.
Анаабыр улууһугар «Алмаас» култуура киинигэр бүгүн 15 чаастан оҕолору кытта көрсүһүү буолан ааста. Онтон киэһэ 18 ч «Тиэтэйбит» кэмиэдьийэни көрдөрдүлэр.
Итиэннэ сарсын 15 чаастан олоҥхоһут Павел Романов-Мыланыыскай «Кыыс Ньургустай Куо» олоҥхотун СӨ үтүөлээх артыыската Софья Баранова толоруоҕа. Киэһэ 18 чаастан Дмитрий Таас айымньытынан «Кыһыл көмүс хоруоп» испэктээги көрдөрүөхтэрэ.
Кэлиҥ, сылдьыҥ, ыалдьыттааҥ, түгэни мүччү тутумаҥ!
Санатан эттэххэ, дойду үрдүнэн бэрэсидьиэн өйөбүлүнэн “Дьиэ кэргэнинэн бары бииргэ” («Всей семьей») улахан федеральнай бырайыак саҕаламмыта. Бырайыакка ким баҕалаах кыттыан сөп. Ол курдук, дьиэ кэргэнинэн хайдах сынньаммыттарын эбэтэр сөбүлүүр дьарыктарын түһэрэн социальнай ситимнэргэ таһаарыахтаахтар. Бырайыак саайта: всейсемьей.рф
