Сааскылаах оҕо этин-сиинин сайыннарар оскуолатыгар уһуйааннар икки ардыларыгар спартакиада буолан ааста. Күрэх Арассыыйаҕа “Дьиэ кэргэн” уонна Саха сиригэр “Оҕо сыла” сылыгар ананна.
Спартакиада үөрүүлээх аһыллыытыгар Арассыыйа, Саха Сирин уонна Анаабырбыт улууһун гимнэрэ тыаһаата. Уопсайа түөрт хамаанда кыттыыны ылла — “Чуораанчык”, “Тугутчаан” уһуйааннар иитээччилэрэ уонна үһүс, төрдүс хамаанда уһуйааннар төрөппүттэрэ.
Хамаандалар түөрт түһүмэҕинэн күрэхтэстилэр. Бастакы түһүмэххэ интеллектуальнай оонньууга кииристилэр. Манна кыттааччылар спортивнай боппуруостарга хоруйдаатылар. Хас биирдии сөптөөх эппиэт баалынан көрүллүннэ. Иккис түһүмэх — веселые старты. Кыттааччылар илин-кэлин түһэн тыҥааһыннаахтык кииристилэр. Үһүс түһүмэххэ хамаанданан скакалкаҕа биир тэҥ буолан ыстаннылар. Төрдүс түһүмэххэ канат тардыһыыта буолла.
Түһүмэҕи барытын дьүүллүүр сүбэ сыаналаата. Дьүүллүүр сүбэҕэ улуус баһылыгын социальнай боппуруостарга солбуйааччыта Николай Андреев, ГИМС сүрүн исписэлииһэ Николай Иванов уонна баһаарынай сулууспа үлэһитэ Сергей Винокуров киирдилэр.
Күрэх түмүгүнэн бочуоттаах үһүс миэстэ “Тугутчаан” уһуйаан үлэһиттэрэ буоллулар, иккис миэстэ — “Тугутчаан” төрөппүттэрэ, бастакы миэстэни “Чуораанчык” уһуйаан үлэһиттэрэ ыллылар. Кыайыылаахтары грамоталарынан уонна минньигэс сакалаатынан эҕэрдэлээтилэр.
Бу курдук хааннарын-эттэрин оонньотон, ыһыытаан-хаһыытаан бэртэээхэй оонньуу буолан ааста.