Кулун тутар 6 күнүгэр саҥа олохтоммут модельнай библиотекаҕа сандал саас маҥнайгы бырааһынньыгын чэрчитининэн нэһилиэнньэ дьарыктаах буолуу киинин гылаабынай исписэлииһэ Ирина Ивановна Ким уонна бастакы категориялаах инспектора Ньургуяна Михайловна Андросова олохтоохторго үлэ дьаарбанкатын тэрийэн ыыттылар.
Дьаарбаҥка сыала- соруга араас тэрилтэлэр салайааччыларын уонна үлэҕэ наадыйар дьону биир дьыалаҕа түмүү, дьону — сэргэни үлэ эйгэтигэр сыһыарыы буолар. Дьаармарка кыттааччылара тэрилтэ салайааччыларын кытары утары — таара олорон тута интириэһиргээбит идэтинэн собеседование ааһыахтарын сөп. Үлэ рыногын уратыларын учуоттаан туран, саамай кэрэхсэбиллээх вакансиялары талан, үөрэтэр- иитэр кыахтары уонна өйөбүлү биэриэхтэрин сөп.
Салайааччылар бары ыалдьыттары кэлэн иһэр кэрэ аҥардар күннэринэн эҕэрдэлээтилэр уонна бүгүҥҥү бэбиэскэлэрин былаанын кэпсээтилэр.
Тэрилтэлэр салайааччыларыгар уонна үлэ көрдөнөөччүлэргэ буклет түҥэттилэр, күөх экраҥҥа слайд көрдөрөн үлэ ымпыктарын — чыымпыктарын сиһилии көрдөрөн кэпсээтилэр, үлэни сөптөөхтүк таларга тренинг ыыттылар.
Тренинг диэн — боростуойдук быһаардахха дьоҕуру уонна билиини сайыннарыыга туһуламмыт үөрэх процеһа. Үксүгэр бөлөҕүнэн ыытыллар уонна теоретическай уонна практическай дьарык буолар.
Үлэ көрдөнө кэлбиттэргэ үлэҕэ сыһыаннаах психологическай тест уонна резюме толоттордулар. Барытын күөх экран нөҥүө быһааран кэпсээтилэр.
Улуустааҕы дьаһалта дьиэтигэр капитальнай отделыгар тутуу начальнигын солбуйааччыта наада диэн анна Анатольевна биллэрдэ. Тыа хаһаайыстыбатын управлениятын салайааччыта Туяра Виссарионовна орто да үрдүк да үөрэхтээх тыа хаһаайыстыбатын исписэлииһэ наадатын эттэ. Баҕалаах киһини үөрэххэ ыытан үөрэттэриэхпитин сөп диэн эбэн биэрдэ. Уонна да атын араас вакансиялар баалларын биллэрдилэр.
Билигин үлэһиккэ наадыйар тэрилтэлэр «Работа в России» порталга үлэ миэстэтин ыйдахтарына дойду араас муннугуттан көрүөххэ, билсиэххэ сөп. Бу портал туһунан эмиэ кылгатан кэпсээн — быһааран биэрдилэр.
Анал байыаннай дьайыыга сылдьар биир дойдулаахтарбыт дьиэ кэргэттэригэр, кинилэр чугас аймахтарыгар үлэннэн, үөрэҕинэн хааччыйааһын туһунан эмиэ кэпсэттилэр. Кинилэри өйөөһүҥҥэ күүстээх үлэ бара турарын биллэрдилэр.
Дьаармарка түмүктэниитэ психологическай тиэстэр эппиэттэрин көрөн быһаарсан кэпсэттилэр, боппуруостарга хоруйдаатылар.
Билигин тэрилтэлэр үксүлэрэ анал идэлээх эрэ үлэһиккэ наадыйаллар. Ол иһин, дьарыктаах буолуу киинэ дьону араас үөрэхтэргэ үөрэттэрэр.
Мария ЯРОЕВА