Үрүҥ Хайа орто оскуолатыгар 10 уонна 11 кылаас үөрэнээччилэрэ чааһынай бырайыактарын көмүскээтилэр.
Тус бырайыагы толоруу — үөрэх программатын тутаах чааһа, ону олоххо киллэриигэ оскуола учууталлара уонна үөрэнээччилэр бииргэ үлэлииллэр. Бырайыактыыр уонна чинчийэр үлэ көмөтүнэн үөрэнээччилэр сүҥкэн информацияны кытта үлэлээн үөрэнэллэр, быһыыны-майгыны быһаарарга, анааран толкуйдуурга, тус сыыһаларын-халтыларын өйдүүргэ уонна төттөрү өттүнэн көмөлөөх үлэни өссө тупсарарга үөрэнэллэр.
Хамыыһыйа болҕомтотугар араас хайысханан бырайыактары билиһиннэрдилэр. Ол курдук, кулинария, спорт, педагогика, креативнай индустрия, генеалогия уонна да атын хайысхалар киирдилэр.
Семенова Каролина “Бисквитный торт” оҥорон көрдөрдө. Каролина билигин бэйэтэ сакааһынан дьоҥҥо торт оҥорон атыылыыр эбит. Спиридонова Валя, 11 кылаас үөрэнээччитэ, минньигэс синнабоннары оҥорон көмүскээтэ. Туприна Прасковья, 11 кылаас үөрэнээччитэ, “Начальнай кылаастарга математикаҕа эбии сорудахтар” диэн интэриэһинэй бырайыак оҥордо. Сыроватскай Алдан, 10 кылаас үөрэнээччитэ, фотограф идэтин көмүскээтэ. Алдан хаартыскаҕа түһэриинэн дьоһуннаахтык дьарыктанар. Үрүҥ Хайаҕа буолар тэрээһиннэри сырдатар. “Салон красоты” өҥөнү оҥоруу эйгэтигэр 10 кылаас кыргыттарын бырайыактарын эмиэ көрдүлэр. Уолаттар бырайыактара — “Видеоигра”, “Исследование родословное”, “Спорт” уонна да атыттар.
Хамыыһыйа састаабыгар киирдилэр Үрүҥ Хайа оскуолатын дириэктэрэ Неустроева С.В., үөрэх чааһын сэбиэдиссэйэ Туприна М.П. Ону сэргэ кылаас салайааччылара уонна бырайыактар салайааччылара бааллар.
Мария Яроева