2024 сыл түмүктэрэ уонна саҥа 2025 сыл соруктара

Тохсунньу 11 күнүгэр “Алмаас” култуура киинигэр икки үөрүүлээх тэрээһин буолан ааста – Арассыыйа үрдүнэн Дьиэ кэргэн уонна оройуоммут иһинэн Волонтер сылларын  үөрүүлээх быһыыга-майгыга түмүктээһин уонна кэлбит 2025 сылы көрсүү тэрээһинэ буолан ааста.

Үөрүүлээх аһыллыыга «Утум Удьуордар» бэстибээл кыттыылаахтара Анаабыр улууһун гимнынан арыйдылар. Култуура киинин үтүөлээх үлэһитэ Мария Анисимовна Попова «Утум Удьуордар» бэстибээллэрин кыайыылаахтарын биллэрдэ. Спортивнай түһүмэх кыайыылааҕынан Корякиннар удьуордара ааттаннылар, иккис Дьяконовтар буоллулар, оттон үһүс бочуоттаах миэстэҕэ Акакиевтар удьуордара тигистилэр. Бары кыайыылаахтар харчылаах сэртэпикээтинэн наҕараадалаатылар. Иккис көрүҥҥэ Туупуруннар удьуордара бастаан, бэйэлэрин көлүөнэлэрин туһунан кинигэ таһаартаралларыгар 300 тыыһынча солкуобайдаах сэртэпикээтинэн наҕараадаланнылар.

Салгыы улуус баһылыга Эдуард Платонов улуус дьаһалтатын уонна тус бэйэтин аатыттан саргылаах Саҥа дьыл кэлбитинэн саала иһигэр мустубут дьону эҕэрдэлээтэ. Кэлбит 2025 сылы РФ Бэрэсидьиэнэ Владимир Путин Аҕа дойдуну көмүскээччи сылынан биллэрбитэ, оттон Ил Дархан Айсен Николаев Төрөөбүт дойдуну көмүскээччи сылынан биллэрбитэ. Быйыл Анаабыр улууһа тэриллибитэ үбүлүөйдээх 95 сааһын туолар. Баһылык улууспутун, дойдубутун көмүскүү сылдьар буойуттарга барҕа махталын тиэртэ уонна дойдуларыгар доруобай төннөллөрүгэр, кыайыыны аҕалалларыгар баҕарда. Иннэ диэн туран көмөлөрүн-өйөбүллэрин иһин  улуус дьаһалтатын аатыттан махтал суруктары уонна сэмэй бэлэхтэри туттарда. Ол курдук махтал суруктары туттулар: Им Егор Сусанович, Катанова Лена Кимовна,Кылтасова Вера Михайловна, Лебедева Зинаида Спиридоновна, Фадеев Иван Васильевич, Находкин Николай Иванович, Винокуров Алексей Алексеевич, Нехоруков Эрхан Михайлович, Меликова Валентина Егоровна, Спиридонова Зинаида Николаевна, Павлова Диана Васильевна, Иванов Николай Павлович, Слепцова Надежда Николаевна, Корякин Тимур Аркадьевич, Стропша Октябрина Александровна. Маны таһынан улуус чааһынай урбаанньыттарыгар: Корякин Аркадий Алексеевичка, Николаев Александр Александровичка, Захаров Яков Николаевичка, Туприн Константин Иннокентьевичка, Николаева Вера Ивановнаҕа, РО КМНС «БАЛЫКСЫТ» Туприн Василий Ануфриевичка, ООО «Услуга» Резник Виктор Григорьевичка, Андреев Михаил Борисовичка, Омурбеков Бактыбек Болотбековичка. Маны тэҥэ оскуола үөрэнээччилэрин актыбыыс оҕолоругар эмиэ махтал суруктары туттартаата.

Тэрээһин иккис чааһыгар Арассыыйа Аҕа дойдуну көмүскээччи сылын үөрүүлээх аһыллыыта буолла. Сыанаҕа быстах байыаннай дьайыыттан кэлбит, кэлэ сылдьар буойуттары чиэстээтилэр. Буойун уолаттарбытыгар истиҥ-иһирэх махтал тыллары эттилэр, өйдөбүнньүк бэлэхтэри туттардылар.

Улуус баһылыгын социальнай боппуруостар солбуйааччы Николай Андреев улууспут үбүлүөйдээх сылынан эҕэрдэ тылын эттэ, бу сыл туох улахан тэрээһиннэр буолалларын кылгатан билиһиннэрдэ. Оскуола үөрэнээччилэрин  “Юнармия”, “Бойцы Арктики” байыаннай этэрээттэригэр, салайааччыларыгар байыаннай дьайыы кыттыылаахтарын дьонноругар көмөлөрүн иһин махтал суруктары туттарда. Маны тэҥэ “Юнармия” этэрээт дьиэ кэргэттэригэр:  Елена Николаевнаҕа уонна  Иннокентий Васильевич Поповтарга, Арьяна Афанасьевна уонна Алексей Алексеевич Туприннарга, Лилианна Радиевна уонна Хрисанф Афанасьевич Назаровтарга эмиэ махтал суруктары туттарда.

 

Читайте дальше