Бэс ыйын төрдүс күнүттэн Сааскылаахха оҕо лааҕырдара үлэлэрин саҕалаатылар. Оттон Үрүҥ Хайаҕа бэс ыйын маҥнайгы күнүттэн арыллыбыттара. Уопсайа Анаабыр улууһугар 2 лааҕыр оскуола саастаах оҕолоругар аанын арыйда.
Улуустааҕы гимназия иһинэн “Радуга детства” диэн лааҕыр күнүскү бириэмэҕэ 2 сезонунан үлэлиэҕэ. Бастакы сезоҥҥа 115 оҕо сылдьан саҕалаатылар, оттон иккис сезоҥҥа 60-ча оҕо хабыллыа. Сааскылаах лааҕырын салайааччытынан буолар Людмила Туприна. Лааҕыр 6 этэрээтинэн хайынна: “Орлята учатся летать” уопсай сайдыы хайысхалаах, “Орлята России” спортивнай уонна уопсай сайдыы хайысхалаах, “Время первых” гражданскай- патриотическай хайысхалаах, “Береги планету” экологическай хайысхалаах, “Юноармейцы” патриотическай, байыаннай-спортивнай хайысхалаах уонна “Я инженер” техническай хайысхалаах.
Оттон Үрүҥ Хайаҕа “Сияние севера” диэн 5 этэрээттээх лааҕыр бэс ыйын бастакы күнүттэн аһылынна. Бастакы сезон начальнига Раиса Туприна. Ол курдук, бастакы этэрээт “Орлята России” гражданскай-патриотическай хайысхалаах. Иккис “Российское движение молодежи” уопсай сайыннарыы хайысхалаах. “Розовая чайка” экологическай хайысхалаах. “Үүлэ уонна Солива” кыраайы үөрэтии хайысхалаах. Уонна бүтэһик “Лидер” (байыаннай-патриотическай кулууп) байыаннай-спортивнай хайысхалаах. Бастакы сезоҥҥа 100 оҕо сылдьар, иккис сезоҥҥа 65 оҕо сылдьыаҕа.
Уопсайа Анаабыр улууһугар 340 оҕо лааҕырдарга сынньаныахтара. Билигин да Сааскылаахха “Юнармейцы” уонна “Береги планету” этэрээттэргэ өссө да миэстэ баар диэн, оҕолору эбии үөрэхтээһин киинин дириэктэрэ Снежанна Им биллэрдэ. Этэрээттэр оҕону сайыннарыыга аналлаах бырайыактарынан үлэлииллэр. Оҕолор сүрүн соруктарыгар киирэллэр: саҥаны билиигэ уһуйуллуу, саҥа талааны арыйыы, саастыылааххын кытта бодоруһа уонна бэйэни салайына үөрэнии.
Маны таһынан Анаабыр улууһуттан бэс ыйыгар босхо Краснодарскай кыраайга сынньалаҥ уонна чэбдигирдэр лааҕырыгар биир оҕоҕо путевка көрүллүбүт. “Развитие Арктической зоны и КМНС” бырагырааманан атырдьах ыйыгар эмиэ Краснодарскай кыраайга оскуола саастаах оҕолорго 4 квота көрүлүннэ.
Анал байыаннай эпэрээссийэ кыттыылаахтарын оҕолоругар көмө быһыытынан тэриллэр Саха Өрөспүүбүлүкэтин лааҕырыгар уонна өрөспүүбүлүкэ таһыгар Краснодарскай кыраай чэбдигирдэр лааҕырыгар биирдии квота көрүлүннэ. Улуус лааҕырдарыгар, “Радуга детства” лааҕырга 8 квотаны, “Северное Сияние” лааҕырга 3 квотаны көрдүлэр.
Сайыҥҥы бириэмэҕэ МУП “Арктика” уонна МУП “Спиридонова” ыстаадаларыгар 57 оҕо айылҕалыын алтыһа сынньана таҕыстылар.
Дьиэ кэргэн уонна эдэр ыччат бэлиитикэтин управлениетын көҕүлээһининэн от ыйын 12 күнүттэн атырдьах ыйын 30 күнүгэр диэри “Дворовые отряды” аһыллара күүтүллэр.
Оҕолорго умнуллубат түгэннэрдээх кэрэ сайыны баҕарабыт.