“Алмаас” култуура киинигэр сылын аайы ыытыллар “Гимназист года” буолан ааста. Быйылгы тэрээһин Саха Өрөспүүбүлүкэтин күнүгэр ананна.
Тэрээһини Саха Өрөспүүбүлүкэтин гимнынан арыйдылар. Сыл устата гимназия үөрэнээччилэрэ араас күрэстэргэ бэйэлэрин көрдөрдүлэр, гимназия чиэһин биһиги оройуоммут сиригэр-уотугар да, тас өттүгэр да көмүскээбиттэрэ. Тэрээһиҥҥэ бастыҥтан бастыҥнары быһаардылар. Сыанаҕа туйгун үөрэнээччилэр ыҥырылыннылар. Уопсайа 16 оҕо таҕыста. Үөрэнээччилэри эҕэрдэлээтэ гимназия оскуолатын дириэктэрэ Валентина Матвеева, грамоталары туттартаата.
Тэрээһиҥҥэ 9 номинация ааттанна. Ол курдук бастакы “Интеллект” номинация аатын сүктэ начальнай кылаастартан Акакиева Уйгулаана, 1 кылаас үөрэнээччитэ. Улахан кылаастартан Усова Карина, 9 кылаас үөрэнээччитэ. «Интеллект» номинация чаҕылхай интеллектуальнай дьоҕурдаах үөрэнээччилэргэ ананна. Бу бүтүн Арассыыйатааҕы олимпиадалар кыайыылаахтара уонна призердара.
Кыайыылаахтары эҕэрдэлээтэ Оксана Туприна, иитии уонна эбии үөрэхтээһин отделын исписэлииһэ. Иккис номинация “Наука” аатын сүктэ Егорова Стефания, 1 кылаас үөрэнээччитэ уонна Пономарева Дора, 10 кылаас үөрэнээччитэ. Наука — киһи аймах мунньуллубут билиитин сүдү баайа. Наука дьоно — киһи аймах инники олоҕун илдьэ сылдьар дьон. Кыайыылаахтары эҕэрдэлээтэ Розалия Толбонова Розалия, иитии уонна эбии үөрэхтээһин отделын салайааччыта. “Творчество” номинация аатын ыллылар Кириллина Самина, 1 кылаас үөрэнээччитэ уонна Федоров Эрэл, 10 кылаас үөрэнээччитэ. «Творчество» номинация улуустааҕы, өрөспүүбүлүкэтээҕи, бүтүн Арассыыйатааҕы творческай куонкурстар кыайыылаахтарыгар уонна призердарыгар ананар. Кыайыылаахтары эҕэрдэлээтэ Саргылана Туприна, уруһуй уонна муусука предметтарын учуутала, оҕону иитии дириэктэрин сүбэһитэ.
“Спорт” номинациятын ыллылар Болуров Владислав, 4 кылаас үөрэнээччитэ уонна Ядреев Алексей, гимназия быйылгы выпускнига. Гимназистарга спорт — уруок кэнниттэн хобби уонна куруһуоктар буолбатах. Бу олох сорҕото, доруобай, доруобай тыын буоллаҕа. Номинация кыайыылаахтарыгар эҕэрдэ тылларын эттэ Сергей Протодьяконов, оҕо этин-сиинин эрчийэр-сайыннарар оскуолатын дириэктэрэ. «Надежда гимназии» номинация аатын ылла Платонов Даниил, 7 кылаас үөрэнээччитэ.
«Надежда гимназии» номинация хас биирдии үөрэнээччигэ итэҕэли, өйөһүүнү, өйдөһүүнү үөскэтиигэ хас биирдии үөрэнээччи оруолун тоһоҕолоон бэлиэтииргэ угуйар. Кыайыылааҕы эҕэрдэлээтэ Чэмэлиинэ Соктоева, Анаабырдааҕы эдэр ыччат бэлиитикэтин исписэлииһэ. “Открытие года” номинация аатын сүктэ Адыя Анзат, 7 кылаас үөрэнээччитэ. “Открытие года” номинация быйылгы үөрэх дьылыгар араас ситиһиилэрдээх, конференцияларга, конкурстарга, күрэхтэһиилэргэ көхтөөх кыттааччыларга ананна. “Прорыв года” номинация аатын ылла Васильев Дамир, 11 кылаас үөрэнээччитэ. Бу номинация үөрэх сылыгар бэйэтин сайдыытыгар, үөрэххэ саҥа үрдүк ситиһиилэри оҥорбут дьону бэлиэтиир. Кыайыылааҕы эҕэрдэлээтэ Валентина Матвеева, Анаабырдааҕы гимназия оскуолатын дириэктэрэ. “Лидер года” номинацияны ылла Окорокова Евгения, 10 кылаас үөрэнээччитэ.
Дьэ уонна саамай долгутуулаах номинация аатын биллэрэр чааһа үүннэ. Бастыҥтан бастыҥ “Гимназист года” аатын ылла Шилкин Антон, 10 кылаас үөрэнээччитэ. Сааскылаах нэһилиэгин баһылыга Алексей Петрович кыайыылаахха эҕэрдэ тылын эттэ уонна сертификат туттарда. Номинацияҕа тиксибит оҕолор грамотанан наҕараадаланнылар.
Сыл тухары ураты кыһамньыларын уурбут, оскуолаларын олоҕор, тэрээһиннэргэ көхтөөхтүк кыттыбыт үөрэнээччилэргэ махтал үтүө тылларын анаатылар.