Анаабырга мобильнай биригээдэ быраастара кэллилэр

Алтынньы 7 күнүгэр Анаабыр улууһугар  доруобуйа уонна медицинскэй профилактика республикатааҕы  общественнай кииниттэн хас да хайысхалаах мобильнай биригээдэ үлэлии кэллэ.

Бүгүҥҥүттэн Сааскылаах нэһилиэгэр  мобильнай биригээдэ быраастара “Алмаас” култуура киинигэр олохтоохтору көрөн саҕалаатылар. Биригээдэ састаабыгар  уопсайа 12 быраас баар — терапевт, кардиолог, акушер-гинеколог, окулист, ортопед, УЗИ бырааһа, эндокринолог, ЛОР, педиатр, невролог, хирург-уролог, нарколог. Быраастар биир күн Сааскылаах олохтоохторун көрөн баран, салгыы сарсын Үрүҥ-Хайа олохтоохторун 3 күн устата көрүөхтэрэ. Онтон Сааскылаахха төннөн, эбии түөрт күн ыарыһахтары көрөллөрө былааннанар.

Аина Григорьева, терапевт: «Бүгүҥҥүттэн Сааскылаахха ыарыһахтары саҥа көрөн саҕалаатыбыт. Былаан быһыытынан, бүгүн вертолетунан Үрүҥ-Хайаҕа көтүөхтээх этибит, туох эрэ биричиинэттэн көппөтүбүт.

Быйыл саастаах уонна туһунан диагнозтаах ыарыһахтартан онкоскрининг анаалыһын ылан куоракка илдьиэхтээхпит. Эбии быраас анааһынынан, биохимическэй хаан анаалыһын, гормон, щитовидная железа анаалыстарын ылабыт. Гинекология анаалыһын эмиэ быраас көрөн аныыр», — диэн ити курдук кылгастык билиһиннэрдэ.

Санатан эттэххэ, мобильнай биригээдэ Анаабыр улууһугар быйыл үһүс сырыылара буолар.  Хоту дойду уһук нэһилиэгэр идэлээх быраастар кэлэн олохтоохтору көрөрө-истэрэ мэлдьи кэтэһиилээх уонна үөрүүлээх сонун.

Читайте дальше