Ыраах муора кытыытыгар, Анаабыр улууһун Үрүҥ Хайатыгар чөл олоҕу тутуһан, сүрүн болҕомтолорун оҕо иитиитигэр ууран, үлэни өрө тутан, ону тэҥэ барытыгар талааннаах, дьоһун-мааны ыал буолан олорор Кылтасовтары киһи сөҕө-махтайа, сэргии көрөр.
Дмитрий Николаевич Кылтасов төрөппүттэригэр ахсыс оҕонон күн сирин көрбүтэ. Төрөппүттэрэ удьуор туундара дьоно этилэр. Дмитрий оскуоланы 1989 сыллаахха Үрүҥ Хайаҕа бүтэрэн баран, Бурятияҕа аармыйаҕа икки сыл сулууспалаабыта. Аармыйа кэнниттэн уонча сыл нефтебаазаҕа операторынан үлэлээбитэ.
Олоҕун аргыһын Марианна Афанасьевнаны көрсөн, түөрт оҕону төрөтөн, Үрүҥ Хайа дьоһун, мааны ыала буолан олороллор. Иккиэн оҕо уһуйаанын тутаах дьоно: Марианна иитээччи көмөлөһөөччүтүнэн, Миитэрэй харабылынан үлэлииллэр.
Миитэрэй айылҕа киһитэ — сайын Куочаҕа, Үөлэҕэ мотуорунан тиийэн балыктыыллар, куска-хааска сылдьаллар. Кини өссө мас ууһа буолан, сайын уонна күһүн доҕотторун кытары элбэх дьиэни туттулар, өрөмүөннээтилэр, түннүктэргэ, күүлэлэргэ оһуор-мандар оҥороллор. Быраата Ньукуулуун «Байанай ыһыаҕын” сиригэр сэргэлэри ойуулаан, оһуордаан, киэргэтэн туруорбуттара.
Ону таһынан бырааһынньыктарга былакааттары, киэргэллэри уруһуйдуур буолан, ыҥырыыга сылдьар. Миитэрэй үксүгэр айылҕаны уруһуйдуур. 2008 сыллаахха улуустааҕы ыччат бырааһынньыгар грамотанан бэлиэтэммитэ, Дьиэ кэргэн сылыгар ыытыллыбыт улахан тэрээһиҥҥэ “Көһө сылдьар дьиэ кэргэн” номинацияҕа бастакы миэстэни ылбыттара. Быыстапкаҕа уруһуйдарынан анал дипломунан наҕараадаламмыта. Уруһуйдара үгүс ыал дьиэтигэр ыйанан турара көрүөххэ олус үчүгэй. Кини уруһуйдуурун сэргэ, маһынан, муоһунан кыһан оҥорор, этэрбэс улларар, уһанар мастарыскыайдаах.
Анаабыр улууһугар дьонугар-сэргэтигэр «Миитээс» диэн аатынан биллэн, улуус дьоно этэрбэстэрин уллаттара киниэхэ ыыталлар.
Кылтасовтар оҕолоро — үлэ-үөрэх дьоно. Диана Н.Г.Чернышевскай аатынан Бүлүүтээҕи профессиональнай-педагогическай кэллиэһи бүтэрэн, иитээччи идэтин баһылаабыта, «Уохтала» үҥкүү ансаамбылыгар дьарыктаммыта.
Оксана Арктикатааҕы судаарыстыбаннай агротехнологическай университекка юрист үөрэҕэр үөрэнэр, успуордунан дьарыктанар – илии-атах оонньуутугар СӨ успуордун маастара. Давид П.И.Дудкин аатынан сибээс уонна информационнай технология кэллиэһигэр үөрэнэр, аҕатын курдук уруһуйдуурун сөбүлүүр.
Онтон саамай кыралара Кирилл 3-с кылаас үөрэнээччитэ.
Галина БОРИСОВА-ТОЛБООНО