Соторутааҕыта Сааскылаахха Үүнэр көлүөнэ библиотекатыгар уонна Үрүҥ Хайаҕа Анаабыр улууһун бочуоттаах олохтооҕо, Саха сирин суруйааччыларын Сойууһун чилиэнэ , 14 кинигэ ааптара Туприн Николай Лукич – Кэһиилээх уола “Төрөөбүт дойдуга таптал” диэн саҥа буруолуу сылдьар кинигэтин сүрэхтээтэ. Үүммүт 2025 сыл – Арассыыйаҕа Аҕа дойдуну көмүскээччи сылынан, Улуу Кыайыы үбүлүөйдээх 80 сылынан, Саха республикатын үрдүнэн ийэ дойдуну көмүскээччи сылынан биллэрилиннэ. Быйыл тапталлаах улууспут, дойдубут Анаабыр төрүттэммитэ үбүлүөйдээх 95 сылын бэлиэтиир. Аҕа, Ийэ дойдуну көмүскээччилэр сылларыгар эдэр көлүөнэни биир тыыҥҥа туһаайы, патриотизм тыына олохсуйарыгар уонна төрөөбүт дойдуга таптал, улууспут инники кэскилэ, хас биирдиибит түмсүүлээх буолуубутуттан тутулуктаах.
Ыҥырыллан кэлбит ытык-мааны ыалдьыттары сахалыы сиэринэн аал уоту оттон, арыылаах алаадьынан алы гынан аһатар туомунан, алгыстаах тылларынан Гавриил Толбонов, Үрүҥ Хайаҕа Сергей Сыроватскай айхаллаабыттара. Суруйааччыга саҥа кинигэтин сүрэхтэниитэ оҕо төрөөһүнүгэр тэҥнэһэр диэн мээнэҕэ эппэттэр, өр иитиэхтэтэ сылдьыбыт санаатын сурукка-бичиккэ иһэн киэн араҥаа, ааҕааччылар дьүүллэригэр таһаарара улахан үөрүү, долгутуулаах түгэн. «Төрөөбүт дойдуга таптал» кинигэ 5 түһүмэхтээх, 125 сирэйдээх, 150 тирааһынан “Сайдам” кинигэ кыһатыгар бэчээттэннэ. Саҥа кинигэ биэс сүрүн түһүмэхтэн турар: “Төрөөбүт дойдуга таптал туохтан саҕылларый?”, “Өбүгэ дьарыгын эн алҕаа”, “Үчүгэйиэн киһи буолан”, “Эйиэхэ тэҥнээх дойду суох”, “Дьүрүһүй, Анаабыр тойуга”. Николай Лукич аан тылыгар кинигэ бэчээттэнэн тахсарыгар көмөлөспүт «Анаабыр (долган-эбэҥки) национальнай улууһун» МО администрациятыгар (баһылык Платонов Эдуард Петрович), «Сааскылаах нэһилиэгэ» МТ администрациятыгар (баһылык Николаев Алексей Петрович), предприниматель Аркадий Алексеевич Корякиҥҥа дириҥ махталын тиэрдибитэ, ыалдьыттарга саҥа кинигэтин ис хоһоонун, сыалын-соругун иһитиннэрбитэ. Ааптар төрөөбүт дойдуга таптал оҕо төрөппүтүн кытта сылдьан, олохторо ыараханын, чэпчэкитин, тугу үлэлииллэрин этигэр-хааныгар, сүрэҕэр-быарыгар иҥэринэн үлааттаҕына саҕыллар диэн бигэ санаалаах.
Тэрээһиҥҥэ Николай Лукич бииргэ алтыспыт үөлэннээхтэрэ, доҕотторо-атастара, ыҥырыылах ыалдьыттара кыттыыны ыллылар. Бу дьоро күҥҥэргэ поэт ылбаҕай хоһооннорун улахан да дьон, оҕолор да өйдөрүттэн аахтылар. Истиҥ иһирэх тылынан бэйэлэрин эҕэрдэлэрин тиэртилэр Анаабыр улууһун дьаһалтатын аатыттан Трифонова А.А., Сааскылаах эбэҥки нэһилиэгин баһылыгын солбуйааччыта Туприна Т.А., Үрүҥ Хайа долган нэһилиэгин баһылыга Спиридонов Е.В., Российскай Федерация үтүөлээх учуутала, РФ үөрэҕириитин туйгуна, Анаабыр улууһун бочуоттаах олохтооҕо Спиридонова А.Е., улуус депутаттарын сэбиэтин председателэ, Анаабыр улууһугар “Аҕа дойдуну көмүскүүр байыастар дьиэ кэргэттэрэ” комитетын салайааччыта Спиридонова З.Н., культура үтүөлээх үлэһитэ, Анаабыр улууһун төрүт олохтоохторун Ассоциацияларын председателэ Попова М.А. уо.д.а.
Николай Лукич төрөөбүт дойдутугар таптала, айылҕаҕа сыһыана, олох кэрэтин көрүүтэ, хас биирдии түгэни сыаналыыра барыта айымньыыларыгар арылхайдык көстөр. Кини хоһооннорун аахтахха хайдах эрэ киһи санаата чэпчээн, дууһата орто дойду олоҕуттан дуоһуйар, астынар.
Саҥа кинигэ ааптарыгар – Николай Лукичка күүтүүлээх бэлэҕи “Төрөөбүт дойдуга таптал” кинигэни утары ууммутугар, үөрүүнү биһигинниин үллэстибитигэр барҕа махтал буолуохтун!