Нэһилиэккэ босхо сылдьар ыт дьоҥҥо-сэргэҕэ, оҕолорго, кырдьаҕастарга улахан кутталы үөскэтэр. Маны таhынан бэйдиэ сылдьар, хаhаайыттара кыhаммат ыт ахсаана күн-түүн эбиллэн иһэр. Бу кыһалҕа биһиги эрэ улууспут иһинэн буолбакка, Аан дойду үрдүнэн баар кыһалҕа.
Былырыын биһиги улууспутугар бэйдиэ сылдьар ыттарга анаан питомник үлэҕэ киирбитэ. “Саскылах” муниципальнай тэрилтэ бас билиитигэр бэриллибитэ. Бу тэрилтэ бэйдиэ сылдьар ыттары тутуунан, көрүүнэн-харайыынан дьарыктанар. Сааскылаахха алтынньы 4 күнүттэн бэйдиэ сылдьар ыттары тутууга күүстээх үлэ бара турар. Бүгүҥҥү туругунан уопсайа 24 ыт питомникка киирдэ.
— «Бохсо сылдьар ыттар үксэ бары хаһаайыннаахтар. Үлэһиттэр төһө кыалларынан босхо сылдьар ыттары тута сатыыллар. Нэһилиэнньэҕэ ыттаргытын баайыҥ диэн биллэрии эмиэ тарҕанар да, улаханнык ким да кыһаммат. Оскуолаларынан, уһуйааннарынан рейдэлииллэр. Сорох ыттар хаһаайыннара ыттарын көмүскэһэн, үлэһиттэргэ кыһалҕа үөскүүр”, — диэн нэһилиэк баһылыгын солбуйааччыта Туяра Дмитриевна эттэ.
Ыты иитэр дьон эппиэтинэhи өйдөөн, бары ирдэнэр быраабылалары толорон, дьоҥҥо, оҕолорбутугар куттал суоһаабатын туһугар нэhилиэнньэ өттүттэн өйөбүл, көмө баар буолара ирдэнэр, ыты тутар дьон быраабылалары толорон, хас биирдии ыал эппиэтинэстээхтик сыhыаннаhан харамайын баайдаҕына кыаллар. Ыты, оҕону сааратарга, быстах кэмҥэ иитэн баран кэнники быраҕан кэбиhэллэрэ эмиэ бэлиэтэнэр ол түмүгэр бэйдиэ сылдьар кыыллар ахсааннара хаҥаан, киһи доруобуйатыгар кутталы үксэтэллэр.
Ыттаах хаһаайыттар, ыттаргытын баайыҥ, дьоҥҥо-сэргэҕэ харыстабыллаахтык сыһыаннаһыҥ!
Фото газеты «Вести Верхоянья»