Сыл аайы кулун тутар 5 күнүгэр Норуот маастарын күнэ бэлиэтэнэр. Санатар буоллахха, Саха сирин норуоттарын төрүт үгэстэрин сөргүтэр, үйэтитэр уонна сайыннарар сыаллаах, 2012 сыллаахха өрөспүүбүлүкэ баһылыгын ыйааҕынан Норуот маастарын күнэ төрүттэммитэ уонна кулун тутар 5 күнүгэр ыытыллар буолбута.
Биһиэхэ норуот ускуустубатын үгэс буолбут көрүҥнэринэн маһынан, тимиринэн уһаныы, саха төрүт таҥаһын тигии буолаллар. Норуот маастардара былыргы баай уонна үгүс өрүттээх техническэй ньымалары көлүөнэттэн көлүөнэҕэ тиэрдэн иһэллэрэ, элбэх сыллаах уопуту харыстаан туран, норуот уус-уран идэлэрин аныгы тыынныыллара хайҕабыллаах суол.
Бу күн чэрчитинэн Сааскылаах олохтоохторо национальнай таҥастарын кэтэн, Оҕо этин-сиинин сайыннарар саалатыттан Н.Е. Андросов аатынан памятникка диэри сэлэлии хаамтылар. Мария Попова Норуот маастардарын күнүнэн эҕэрдэ тылларын эттэ.
Түмүгэр дьон-сэргэ тоҥолох-тоҥолохтон тутуһан оһуокай тэптилэр.
Ытыктабыллаах нэһилиэкпит норуот маастардара!
Сахабыт сиригэр Норуот маастарын күнүнэн итиитик истиҥник эҕэрдэлиибит! Ытык өбүгэлэрбит этэн хаалларбыт баар хайысхаларынан, үтүө үгэстэринэн, айымньылаах үлэҕитинэн, ураты дьарыккытынан дьону-сэргэни көҕүлээн холобур буолаҕыт! Харах көрөн хайгыыр, дууһаны-санааны сөхтөрөр сыралаах, эбэҥки, долган омук уратытын көрдөрөр айымньылаах үлэҕит куруук ситиһиилээх буоллун, норуот уус-уран идэлэрин оннунан хаалларыыга уонна сайыннарыыга кэрэни, үтүөнү үксэтэр элбэх дьоһун үлэлэри, тус бэйэҕэтигэр кытаанах доруобуйаны, дьолу-саргыны баҕарабыт!
Мария Яроева