Бу күннэргэ улууспутуттан саамай аҕа саастаах байыаспыт СВО-тан дойдутугар аҕыйах хонуктаах сынньалаҥҥа кэлэн барда. «Узоры Анабара» түмсүү салайааччылара кинини көрсөн, хайдах сулууспалыы сылдьарын, туох көмөҕө наадыйалларын иҥэн-тоҥон ыйыталастылар:
«СВО-ҕа ахсыс ыйбын сулууспалыы сылдьабын. Билигин Бахмукка баарбын. Защитнай сеткалар, блиндажнай чүмэчилэр, плащ палаткалар саамай наадалаах туттуллар тэриллэр. Защитнай сетканы ыйаабыт сирбитигэр хаалларан барабыт, хомуйар бириэмэ онно суох. Окуопаҕа блиндажнай чүмэчинэн сырдатынабыт, быһа холоон икки күн умайар.
Уоппускаҕа кэлэрбэр саха волонтердарын үлэлэрин хайҕаатым, көмөлөһөн абыраатылар. Кинилэр сирдээннэр, Оборона министиэристибэтигэр сылдьан ылыахтаах харчыбын быһаарыстым уонна Москваҕа бэртээхэй экскурсияны тэрийдилэр.
Күһүн атырдьах ыйыгар төрдүө буолан Украинаҕа айаннаабыппыт. Тиийээппитин кытта төрдүөммүтүн разведкаҕа анаабыттара. Разведкаҕа бараары сырыттахпытына, миигин барсыбаккын диэннэр бронетехникаҕа киллэрбиттэрэ. Ол үс уол төннүбэтэхтэрэ, билиэн түбэспиттэр этэ. Билигин штурмовой этэрээккэ баарбын. Авдеевканы ылыыга сылдьыбытым. Инники кирбиигэ окуопаттан эрэ ытыалаһа сылдьыбаппыт, атаакаҕа сүүрэн тахсан уун-утары илии- илиигэ эмиэ киирсэбит. Бастакы оннук киирсиигэ сахам быһаҕын сүтэрэн кэбиспит этим. Барарбар бэлэхтээбит харысхалларын устубакка кэтэ сылдьабын. Харысхалым көмөлөһөрүгэр бүк итэҕэйэбин, хайаан да айыыларбыттан көрдөһөбүн. Миигин били окуопаҕа видеоҕа устубут уолбун атын ротаҕа көһөрбүттэрэ. Ол иһин билигин ротабар соҕотох сахабын. Ол уол Тааттаттан төрүттээх, сытыы-хотуу, күүстээх-уохтаах буолан бэйэтин хайа да бэйэлээх омукка атаҕастаппат.
Анараа дойду айылҕата олох атын, бастаан тиийэн атыҥыраабытым. Аны окуопа иһэ бырыы да бадараан, ону таһынан ол бу үөнэ-күрдьэҕэтэ элбэх, эриэн үөн дьэ дэлэй дойдута. Онно куруук тыын былдьаһыгар, утуйар утуйбат икки ардынан сылдьан киһи дьиэтин, күннээҕи эйэлээх олоҕун суохтуур, ордук күүскэ ахтар буолар. Утуйар уу диэни умнубутум ыраатта. Аһылыкпыт наар кэнсиэрбэ ас, итии аһылык буһарынарга биирдэ эмит түгэн көстөр. Сиэннэрим үөрэ-көтө, атыҥыраабакка көрсүбүттэрэ санаабын бөҕөргөттө. Контрагым бүтэрэ 3 ый хаалла».
Түмсүү кыттыылаахтара аҕам саастаах байыаһы этэҥҥэ эргиллэн кэлэригэр алҕаатылар, сэмэй бэлэҕи туттаран үөртүлэр.