«Татыйаана» күнүн устудьуоннар хайдах көрсөллөр

Тохсунньу 25 күнүгэр дойду үрдүнэн «Татыйаана күнэ» диэн ааттаммыт устудьуоннар күннэрэ бэлиэтэнэр. «Татыйаана күнэ» бэрт дириҥ остуоруйалаах. Кылгастык билиһиннэрдэххэ, 1755 сыллаахха бу күн, сибэтиэй Татыйаана күнүгэр, императрица Елизавета Петровна Москубатааҕы университеты арыйар туһунан уураах таһаарбыта. Ол кэмтэн ыла сыл аайы тохсунньу 25 күнүгэр университет олохтоммут үөрүүлээх түгэнин бэлиэтиир буолбуттара. Оттон 2005 сыллаахха дойду президенин Ыйааҕынан бу бырааһынньык официальнайдык сөргүтүллүбүтэ.

Устудьуон күнүн көрсө араас куораттарга баар үөрэх кыһаларыгар үөрэнэ сылдьар биир дойдулаахтарбыт бу күнү хайдах атааралларын кэпсээтилэр.

Леонтий Кылтасов, Покровскай куорат «Колледж цифровых технологий» «АЙТЫЫН» иккис кууруһун устудьуона:

— Тохсунньу 25 күнүгэр устудьуоннар бырааһынньыктарын бэлиэтииллэр. Биһиги анаан устудьуон күнэ диэн бэлиэтээбэппит. Мээнэ күн курдук ааһар. Үөрэхпин наһаа ыарырҕаппаппын, оскуолаҕа үөрэнэ сылдьан бэйэм билэр этим, ханнык идэҕэ туттарсарбын. Уон биирис кылааһы бүтэрэн, билигин Покровскайдааҕы колледжка программист идэтигэр иккис курска үөрэнэ сылдьабын. Устудьуон олоҕо этэҥҥэ баран иһэр. Устудьуон үрдүк аатын сүгэргэ үөрэххэ да, олоххо да бэлэмнээх буолар ордук. Онон оҕолорго дьону кытта алтыһа үөрэнэллэригэр сүбэлиибин.

Анна Бетюнская, Арктическай Государственнай Агротехнологическай Университет үһүс кууруһун устудьуона:

— Тохсунньу 25 күнүгэр устудьуоннар күннэрэ бэлиэтэнэр. Бу күн туох да улахан былаан суох эрээри, боростуойдук көрсүөм дии саныыбын. Мин Арктическай Государственнай Агротехнологическай Университетка экономическай факультетка 3 курска менеджмент диэн идэҕэ үөрэнэ сылдьабын. Саамай приоритетнай идэ ити дии санааммын киирбитим. Устудьуоннар күннэринэн диэн эҕэрдэлиибин. Хорсун дьүккүөрдээх буолуҥ, үөрэхтэн бэйэҕит сайдаргыт туһугар элбэҕи ыла сатааҥ. Уонна чулууттан чулуу буолуҥ.

Жанна Стручкова, Дьокуускайдааҕы гуманитарнай колледж иккис кууруһун устудьуона:

— Устудьуоннар күннэрин өссө «Татыйаана» күнэ дииллэр. Ол гынан баран, мин онно өссө сылдьа иликпин. Мин Дьокуускай куоракка гуманитарнай колледжка иккис курска үөрэнэ сылдьабын. Хаһан баҕарар, ханнык баҕарар үөрэх бастаан ыарахан буолар. Ол эрээри, талбыт үөрэххин интэриэһиргиир уонна сөбүлүүр буоллаххына барытын кыайаҕын. Оскуоланы бүтэрээри сылдьар оҕолорго эрдэттэн быһаарыныҥ, сөптөөх эксээмэннэри туттаран, сөбүлүүр үөрэхтэригэр киирэллэригэр баҕарабын. Устудьуон олоҕо киһини эппиэтинэстээх буоларга үөрэтэр.

Читайте дальше