Улуустааҕы спартакиада биэс удьуор көлүөнэлэрин түмтэ

Сааскылаахха “Алмаас” култуура спортивнай саалатыгар улуус утум удьуордарын түмэр сыаллаах спартакиада буолан ааста. Балаһыанньа быһыытынан аҕыстыы киһилээх биэс хамаанда үс көрүҥҥэ күрэхтэстилэр. Андросовтар, Дьяконовтар, Туприннар, Акакиевтар уонна Слепцовтар көлүөнэлэрэ бастыыр иһин күөн көрүстүлэр, күрэс былдьастылар.

Сарсыардаттан  волейбол көрүҥэр дьиҥ тыҥааһыннаах киирсиилэр аастылар. Манна кыттааччылар ох курдук бэлэмнээхтэрин көрдөрдүлэр. Уҥа-хаҥас сүүрэн, мээчиги тиэрэ-таара охсуолаан бэртээхэй оонньуу ааста. Эрийсиилээх киирсии түмүгүнэн бу көрүҥҥэ кыайыылаах үрдүк аатын Корякиннар ыллылар. Иккис миэстэҕэ Дьяконовтар, үһүс миэстэни Туприннар удьуордара таҕыстылар.

Салгыы эстафетаҕа саамай сымса, быһый удьуору быһаардылар. Дьэ, тыҥааһыннаах киирсии буолла. Бу түмүгэр үһүс миэстэни Акакиевтар, иккис миэстэни Туприннар, бастакы миэстэни Слепцовтар ыллылар.

Долгутуулаах, ыһыылаах-хаһыылаах, хатыһыылаах бүтэһик  көрүҥ тиийэн кэллэ. Хамаандалар  күүстэрин-уохтарын канат тардыһыытыгар көрдөрдүлэр. Хас биирдии кыттааччы санаата күүстээх. Канат тардыһыытыгар эмиэ техникатын сатыахха наада. Биир сутурук курдук хамнаннахха бөҕөхтөрү да кыайаҕын. Киирсии түмүгүнэн үһүс миэстэни Акакиевтар, иккис миэстэни Дьяконовтар хамаандалара ыллылар, муҥутуур бастакы миэстэни Слепцовтар хамаандалара ылла. Слепцовтар удьуордара бары көрүҥҥэ миэстэлэһэннэр кыахтарын көрдөрдүлэр.

Бу иннинэ буолбут төрүт саха оонньууларыгар — хаамыска уонна хабылык быраҕыытыгар үһүс миэстэни Акакиевтар удьуордара, иккис миэстэни Дьяконовтар удьуордара, бастакы миэстэни Слепцовтар удьуордара ылбыттара.

Бары кыайыылаахтар грамоталарынан уонна мэтээллэринэн наҕараадаланнылар.  Манна кэлбит хас биирдии ыалдьааччы  күрэх кыттааччыларыгар ыһыытаан-хаһыытаан, аймахтарыгар ыалдьан долгуйдулар, ытыс дохсун тыаһынан үөрэ-көтө көрүстүлэр, умнуллубат кэрэ түгэни атаардылар.

Спортивнай түһүмэхтэр бары олус тыҥааһыннаахтык аастылар. Кыттааччылар кыайыы иһин дьулуурдарын дакаастаатылар. Удьуордар биллэр спортсменнардаахтарын бу да сырыыга көрдөрдүлэр. Манна удьуордар көлүөнэлэрэ төһө түмсүүлээхтэрэ, бэйэ-бэйэни өйдөһүүлэрэ, өйөһүүлэрэ кыайыыга ордук күүстээх тирэх буолара билиннэ.

Билиҥҥи олоххо түмсүүлээх дьон кыайыыга кынаттаах буоларын умнумуоҕуҥ. Бу курдук удьуор аймахтар бэйэлэрин кыахтарын-күүстэрин, сайдыыларын көрдөрдүлэр.

 

Мария Яроева

Читайте дальше