Саха сиригэр суолу-ииһи оҥоруу үлэтин-хамнаһын СӨ суол управлениетын генеральнай дириэктэрин бастакы солбуйааччы Егор Ефимов “Якутия 24” телеханаалга “Актуальное интервью” биэриигэ иһитиннэрдэ.
—Өрөспүүбүлүкэҕэ суолу-ииһи оҥоруу үлэтэ кулун тутартан саҕаланар. Бу ыйтан Саха сирин суолун-ииһин оҥорооччулар РФ Бэрэсидьиэнэ В.Путин көҕүлээбит “Инфраструктура для жизни” национальнай бырайыагын олоххо киллэрии уочараттаах түһүмэҕэр киирэллэр. Билигин матырыйааллары эрэгийиэннээҕи суоллары оҥоруу, өрөмүөннээһин эбийиэктэригэр таһаллар. Быйылгы сылга көрдөрүүнү ситиһэргэ 15 хантараак түһэрсиллэн турар. Суол үлэтэ быйыл “Анаабыр”, “Умнас”, “Абалаах”, “Нам”, “Амма”, “Мухтуйа”, “Кэбээйи”, “Тиксии”, “Бөтүҥ”, “Өймөкөөн”, “Бороҕон-Танда” эрэгийиэннээҕи суол учаастактарыгар ыытыллыахтара, — диэн этэр Егор Ефимов.
Кини иһитиннэрбитинэн, маны сэргэ “Инфраструктура для жизни” национальнай бырайыагынан 2027 сылга диэри болдьохтоох үс хантараагынан үлэни салгыыр былааннаахтар. Бу “Умнас” суол 20-28 км саҥардыы, “Абалаах” массыына суолун 108 км – Туора Күөл учаастагын оҥоруу уонна “Анаабыр” айан суолугар 0-11,6 км учаастакка хапытаалынай өрөмүөн туһунан этиллэр.
Санатан эттэххэ, 2019 сыл бүтүүтүттэн 2024 сылга диэри “Куттала суох хаачыстыбалаах суоллар” национальнай бырайыак иитинэн өрөспүүбүлүкэҕэ Саха сирин айан суолларын управлениетын бэдэрээтчиттэринэн 1200 км тахса эрэгийиэннээҕи айан суола тупсарыллан оҥоһуллубутун туһунан СӨ Ил Дарханын уонна Бырабыыталыстыбатын пресс-сулууспата бэлиэтиир.