Кулун тутар 6 күнүгэр Д.Ф.Ходулов аатынан норуот айымньытын дьиэтигэр Арассыыйаҕа Норуоттар сомоҕолоһууларын, СӨ Култуура сылларыгар уонна сааскы маҥнайгы бырааһынньыкка анаан кэрэ аҥаардар икки ардыларыгар «Күн Чөмчүүк – 2026» үҥкүү өрөспүүбүлүкэтээҕи аһаҕас күөн күрэһэ ыытылынна. СӨ култууратын үтүөлээх үлэһитэ Александра Винокурова ааптардаах бырайыагынан үтүө үгэскэ кубулуйан сыллата буолар тэрээһиҥҥэ быйыл Дьокуускай куораттан, Бүлүү, Анаабыр, Абый, Нам, Уус Алдан, Амма улуустарыттан, улууспут нэһилиэктэриттэн уопсайа 300-тэн тахса кыттааччылаах 31 үҥкүү кэлэктииптэрэ үрдүк таһымнаахтык кытыннылар.
Кэрэ-нарын далбар хотуннар, килбик кыргыттар толорор иэйиилээх үҥкүүлэрин көрөн-истэн, бастыҥнары быһаарар дьүүллүүр сүбэ бэрэссэдээтэлинэн РФ Театральнай диэйэтэллэрин сойууһун чилиэнэ, СӨ култууратын үтүөлээх үлэһитэ Юрий Федоров уонна СӨ култууратын үтүөлээх үлэһитэ, «Мозаика» бальнай үҥкүү норуодунай ансаамбылын төрүттээччитэ Михаил Сивцев, РФ уонна СӨ култууратын үтүөлээх үлэһитэ, «Гулун» хотугу норуоттар үҥкүүлэрин норуодунай ансаамбылын төрүттээччитэ, өрөспүүбүлүкэтээҕи норуот айымньытын дьиэтин исписэлииһэ Любовь Никитина, СӨ култууратын үтүөлээх үлэһитэ, «Надежда» спортивнай үҥкүү кулуубун салайааччыта, «Кыталык» кииҥҥэ өр сылларга таһаарыылаахтык үлэлээбит биир бастыҥ хореограф Надежда Константинова, СӨ култууратын туйгуна, Мэҥэ Хаҥалас улууһун култуураҕа уонна духуобунай сайдыыга салалтатын исписэлииһэ, тыйаатр, киинэ артыыһа, «Кыталык» ансаамбылга оскуола саҕаттан үҥкүүлээбит иитиллээччи Спиридон Григорьев үлэлээтилэр.
Күрэс бука бары кэрэ аҥаардарыгар сааскы маҥнайгы бырааһынньыгынан эҕэрдэлээн Николай Васильев – Айтамыл, Давид Трофимов, Прокопий Федоров, «Аарык» эр дьон вокальнай бөлөҕө, улуустааҕы култуура уонна духуобунай сайдыы управлениетын эр дьоно ылбаҕай ырыаларын уонна «Кыталык» норуодунай үҥкүү ансаамбылын СӨ култууратын үтүөлээх үлэһитин Алена Давыдова салайааччылаах ХИФУ-тааҕы салаатын кыттыылаахтара кэрэ үҥкүүлэрин бэлэх ууннулар.
Күн түмүгүнэн «Күн Чөмчүүк – 2026» өрөспүүбүлүкэтээҕи кэрэ аҥаардаар үҥкүү күрэҕэр 13-16 диэри саастаах оҕолор икки ардыларыгар ытыс дохсун тыаһынан 3-с истиэпэннээх лауреат аатын «Зурхней гал» бурятскай үҥкүү – Төхтүрдээҕи оҕо ускуустубатын үөрэнээччилэрэ (сал. Елена Тарабукина), 2-с истиэпэннээх лауреат «Көтүү» – «Күннээйик» үҥкүү кэлкэтиибэ (сал. Нюрбина Брызгалова, Хорообут), 1-кы истиэпэннээх лауреат «Скоморохи» – «Сайдам» үҥкүү кэлэктиибэ (сал. Варвара Иванова, Нам улууһа) уонна Кылаан Чыпчаал аатын «Индийскэй үҥкүү» – «Сандал» норуодунай ансаамбыл (сал.Сардаана Катакова, Ангелина Ильинова, Дьокуускай) ыллылар.
17-35 саастарыгар диэри 3-с истиэпэннээх лауреат «Кыталык» – «Дылбаахы ыччата» ү/к (сал.Татьяна,Говорова Дьанхаады), 2-с истиэпэннээх лауреат «Мастерицы» – «Уохтала» ү/к (Изольда Ермолаева, Пелагея Туприна, Анаабыр улууһа), 1-кы истиэпэннээх лауреат «Кавказский танец» – «Дайар» ү/к (сал.Мария Иванова, Нөөрүктээйи) уонна Кылаан Чыпчаал аатын «Хомус үҥкүүтэ» – «Бүлүү долгуннара» норуодунай үҥкүү ансаамбыла (сал. Ирэна Зинурова, Сахая Народова, Бүлүү улууһа) хаһаайыннара буоллулар.
36-50 саастарыгар диэри 3-с истиэпэннээх лауреат «Дэйбиирдээх үҥкүү» – «Уран Оһуор» үҥкүү устуудьуйата (сал.Ньургун Индеев, Юля Петрова, Дьокуускай), 2-с истиэпэннээх лауреат «Дьол тиhигэ – Жаргалай Зангилаа» – «Толбон» ү/к (сал.Лидия Артемьева, Лена Бережнева, Майа), 1-кы истиэпэннээх лауреаты «Тыҥ хатыыта» – «Сыдьаай» ү/к (сал.Шарина Розалия, Майа) ситистилэр.
51 саастарыттан үөһээ Далбар Хотуннарга 3-с истиэпэннээх лауреат аатын «Саламалаах үҥкүү» – «Далбар» ү/к (сал.Татьяна Говорова, Төхтүүр), 2-с истиэпэннээх лауреат «Казахский танец» – «Күндүүнэ» ү/к (сал.Елена Охлопкова, Нам улууһа) 1-кы истиэпэннээх лауреат аатын «Монгольский танец» – «Күбэйэ» ү/к (сал. Мария Иванова, Нөөрүктээйи) ыллылар.
Дьүүллүүр сүбэ быһаарыытынан саамай нарыннык үҥкүүлүүр «Күн-Чөмчүүк – 2026» анал ааты «Дылбаахы ыччата» үҥкүү кэлэктиибэ (рук. Говорова Татьяна, Дьанхаады) кыттааччыла Дайаана Гаврильева ылла.
Тэрээһин кыттыылаахтара айар кэлэктииптэр үлэлэрин билсэн, бэйэ-бэйэлэрин кытары алтыһан, үҥкүү бырааһынньыгын үөрэн-көтөн аатырдалар. Аны бырайыак үбүлүөйдээх 10 сылын бэлиэтиир тэрээһинигэр өссө үрдүк таһымнаахтык кыттарга санаа ылынан тарҕастылар.
Иван Лукин.