Саха Өрөспүүбүлүкэтигэр балаҕан ыйын устата хотугу аҕыйах ахсааннаах төрүт олохтоох норуоттарга төрөөбүт тылларынан саҥарар, үүнэр көлүөнэҕэ тиэрдэ сылдьар дьиэ кэргэн династиятын быһаарар сыаллаах куйаар ситимигэр күрэх ыытыллыбыта. Бу күрэххэ Анаабыр улууһун Үрүҥ-Хайа нэһилиэгэр олорор элбэх оҕолоох Поповтар дьиэ кэргэн муҥутуур кыайыылаах аатын сүктэ. Кинилэргэ харчынан бириис туттарылынна.
Куонкуруска өрөспүүбүлүкэ араас муннугуттан аҕыйах ахсааннаах норуоттар удьуордара кыттыбыттара. Күрэх усулуобуйатыгар олоҕуран, дьиэ кэргэттэр төрөөбүт тылы билэллэрэ, харыстыыллара, тылга сибээстээх култуура уонна үөрэх тэрээһиннэригэр көхтөөхтүк кытталлара учуоттанна. Ону тэҥэ төрүт омук культурнай нэһилиэстибэтин өрө тутуулара ирдэннэ.
Биһиги редакциябыт кыайыылаах дьиэ кэргэни кытары кэпсэттэ.
Поповтар дьиэ кэргэн 2011 сыллаахха сэтинньи 11 күнүгэр тэриллибитэ. Анатолий уонна Анна иккиэн Үрүҥ-Хайаттан төрүттээхтэр, табаһыт ыал оҕолоро буолаллар. И.К. Спиридонов аатынан тэрилтэҕэ үлэлииллэр. Аҕалара икки ыстаада биригэдьиирэ, ийэлэрэ чуум үлэһитэ. 4 оҕолоохтор, бары оскуола дьоно. Улахан уол 8-с, кыыс 6-с, икки кыра уоллаах кыыс иккис уонна бастакы кылааска уһуйуллаллар.
Куонкурус туһунан куйаар ситимиттэн билэннэр, кыттарга быһаарыммыттар. Дьиэ кэргэн туһунан дьоҕус презентация оҥорон, видео устан ыыппыттар. Ону таһынан, ситиһиилэри бигэргэтэр хаартыскалары, грамоталары, уонна да араас наҕараадалары түмэн ыыппыттар.
«Күрэххэ анаан удьуорбутун билиһиннэрбиппит. Хос эһэбит Дьоруой Ылдьааттан саҕалаан кыра кыыспытыгар диэри төрүччү оҥорон кэпсээбиппит. Кэргэним удьуор табаһыттар Прасковья, Валериан Поповтар кыра уоллара буолар, өбүгэ суолун салҕыыр,” — диэн кэпсиир ыал ийэтэ Анна.
«Биир эдьиийбит «Олоххут барыта куонкурус» диэбитинии, араас тэрээһиннэргэ, күрэхтэргэ куруук кыах баарынан кытта сатыыбыт,» — диэн кэпсээнин Анна салҕыыр. — Холобур, 2019 сыллаахха улуустааҕы «Кочевая семья» күрэххэ иккис миэстэни ылбыппыт, онтон 2020 сылга өрөспүүбүлүкэ таһымыгар кыайыылаах аатын сүкпүппүт».
Анна тарбаҕар талба талааннаах, араас быыстапкаларга ситиһиитэ элбэх. Быйыл Дьокуускайга “Якутия мастеровая» уонна «Мир Арктики» быыстапкаларга кыайыылаах буолан, Москваҕа тиийэн «Сокровища Севера» тэрээһиҥҥэ «Полярный стиль» бэстибээлгэ инники күөҥҥэ тахсыбыта. Онтон Анатолий улахан уолун кытта Булчут күнүгэр анаммыт күрэххэ бастаабыттара. Уоллаах кыыс өссө өрөспүүбүлүкэтээҕи хотугу многоборье күрэҕин хас да төгүллээх кыайыылаахтара. Сылын ахсын ыытыллар таба сүүрдүүтүн бырааһынньыгар дьиэ кэргэнинэн кыттан бириистээх миэстэҕэ тиксэллэр.
Поповтар дьиэ кэргэни ситиһиилэринэн эҕэрдэлиибит!
Мария Яроева