Бүгүн, алтынньы 29 күнүгэр, урукку кэмнэрдээххэ эдэр сааһы, эрчими уонна бэриниилээх буолууну түмэр Бүтүн Сойуустааҕы комсомол (ВЛКСМ) үөскээбит күнэ бэлиэтэнэр. Бу бэлиэ күн Анаабыр улууһун устуоруйатын кытта ыкса сибээстээх. Ол курдук, улууспут сайдыытыгар, хотугу сири тутууга уонна саҥа олоҕу түстээһиҥҥэ комсомоллар хорсун үлэлэрэ кыһыл көмүс буочуратынан суруллан тураллар.
Бу күн үгүс ытык кырдьаҕастарбыт бэйэлэрин эдэр саастарын, эрчимнээх комсомольскай сылларын күндүтүк саныыллар. Кинилэр ортолоругар улууска, Үрүҥ Хайа нэһилиэгэр 1930-с сыллардааҕы саамай бастакы комсомолкалартан биирдэстэрэ — тыыл уонна үлэ бэтэрээнэ Мария Васильевна Туприна — Эбээ Маайа этэ.
Мария Васильевна 1936 сыллаахха, Тостуйа начальнай оскуолатыгар үөрэнэ сылдьан, хотугу сиргэ саҥа олох уотун саҕар комсомол кэккэтигэр киирбитэ. Комсомолка кыыс оччотооҕу кэм ирдэбилинэн ханнык да үлэттэн толлубата: табаҕа, балыкка күүскэ үлэлээбитэ, улахан дьону үөрэтиигэ (ликбезка) актыыбынайдык кыттыспута, оҕолорго бастакы кылаастары үөрэнэллэригэр көмөлөспүт үтүөлээх.
Кэлин санитарнай боломуочунайдар курстарын бүтэрэн, ыраах ыстаадаларынан сылдьан ырааһыырдыы, сырдатыы үлэтин күүскэ ыыппыта. Кини кылгас кэмҥэ комсомол уорганнарыгар бэйэтигэр эмиэ үлэлээбитэ.
Улуу Аҕа дойду сэриитин ыарахан сылларыгар комсомольскай иитиилээх 19 саастаах долган кыыһа Мария Туприна Тиигээн ниэбин көрдүүр-чинчийэр үлэлэргэ баран, буровойга «ученик-коллектор» (геолог-техник) быһыытынан үлэлээбитэ. Бастакы нефть скважиналарын туһунан матырыйааллары докумуоннаан, улуус эрэ буолбакка, дойду устуоруйатыгар улахан суолталаах суолу-ииһи хаалларбыта. Сэрии сылларыгар көрдөрбүт тулуурун уонна хорсун үлэтин иһин «За доблестный труд в 1941–45 гг.» медалинан наҕараадаламмыта.
Эбээ Маайа олорбут олоҕо — дьиҥнээх комсомольскай кынаттаах, омуктан, тылтан толлубат, үлэни өрө туппут хотугу киһи үтүө холобура буолан улуус устуоруйатыгар хаалла.
Бүгүн улууспут олохтоохторун, урукку кэмҥэ комсомол эрэллээх кэккэтигэр сылдьыбыт ытык бэтэрээннэрбитин бэлиэ күнүнэн ис сүрэхтэн эҕэрдэлиибит! Кинилэр хорсун үлэлэрэ, тулуурдара уонна дойдуга бэриниилээх буолуулара — кэлэр көлүөнэ эдэр ыччакка өрүү үрдүк холобур буолуоҕа!