Кэлэн иһэр маҥнайгы сааскы бырааһынньыгынан Аан дойду кэрэ аҥардар кэрэ бэлиэлэринэн эҕэрдэлиибит. Бу кэрэ бэлиэ күнүнэн сибээстээн биһиги биир дойдулаахпыт, саха нарын Далбар хотунун кытары сэргэх кэпсэтии буолан ааста. Кини олоххо кэрэни көрөр оһуордаах аартыгынан олус умсугуйан дьарыктанар, оҕуруо тиһэр, оһуор анньар, айылҕаттан талааннаах айар-тутар уран тарбахтаах иистэнньэҥ Лебедева Зинаида Спиридоновна.
Зинаида Спиридоновна Үрүҥ — Хайа нэһилиэгэр 1968 сыллаахха элбэх оҕолоох дьиэ кэргэҥҥэ төрдүс оҕоннон күн сирин көрбүт. Кини оҕо эрдэҕиттэн сөбүлээн иистэнэр. Бу туһунан сиһилии кэпсэттибит.
— “Мин кыра эрдэхпиттэн стадаҕа сылдьан улааппытым, оҕо сааһым стадаҕа эбээбитин кытары ааспыта. Ийэбит эрдэ күн сириттэн туораан эбээбитигэр Александра Титовна Тупринаҕа иитиллибиппит. Эбээм барахсан иистэнэрин наһаа интириэһиргээн көрөөччүбүн. Кэнники син улаатан баран бииргэ иистэнэр буолбуппут. Таба иҥиирин хатаран сап оҥорооччу эбэм, онон кээнчэлэри, үтүлүктэри иккиэн атах тэпсэн олорон иистэнэр этибит. Бастаан иистэнэрбэр, бастакы үлэм оҕо этэрбэһэ этэ. Иискэ интириэһим улаатан испитэ, оҕуруоланар да буолбутум, баанар да буолбутум, дьон тугу — хайдах иистэнэллэрин көрөн үтүктэр да этим. Кэнники иистэнэр массыына баар буолбутугар арааһы барытын тигэр буолбутум. Саамай сөбүлүүр дьарыгым диэн оҕуруо буолар. Оҕо сааспыттан оҕуруону сөбүлээн тиһэбин. Стадаттан киирэрбитигэр оҕуруоннан билэ тиһэн кэһии гынан аҕалааччыбын дьоммор. Дьоннор үлэбин көрөн сөбүлээбиттэр этэ, кэнники сакааска оҥорор буолбутум. Саамай ыарахан үлэм диэн кырса соно этэ. Тыаҕа сылдьан тээтэбэр саҕалаах кырса сонун тигэн турардаахпын. 1985 сыллаахха Сааскылаах оскуолатын бүтэрэн ЯПУ — 2 туттарсан киирбитим, уһуйаан иитээччитин идэтигэр. Кэргэмминээн 1991 сыллаахха көрсөн ыал буолбуппут. Оҕо уруу төрөтөн иккис Дьөппөҥҥө көһөн барбыппыт. Дьиэ уот туттан, сүөһү ииттэн уопсайа уон сэттэ сыл олорбуппут. 2007 сыллаахха төттөрү Сааскылаахха көһөн кэлбиппит. Манна кэлэн баран аллараа бөһүөлэххэ баар урукку уһуйааҥҥа идэбинэн үлэлээбитим. Онтон кэнники “Чуораанчык” уһуйааныгар көспүтүм. Онно 2024 сылга диэри үлэлээбитим. Билигин кыраайы үөрэтэр музейыгар үлэлии хамныы сылдьабын.
Билигин иллэҥ кэммэр “Узоры Анабара” түмсүү дьиэбитигэр иистэниэх баҕалаах кыргыттары ыҥыран иистэнэбит. Араас маастар кылаастары да ыытабыт. Байыаннай дьайыыга сылдьар уолаттарбытыгар ситиммитин быспахха көмөлөһөбүт. Бу быйыл эмиэ харыстыыр сиэткэлэри, харысхаллары оҥорон, кэмпилиэк таҥастары, плащтары тигэн бэлэмнээн ыыталаабыппыт.
Оҕолорум эмиэ иискэ интириэстэрэ баар. Кыра эрдэхтэриттэн куукулаларыгар таҥас тиктэрээччибин, оҕуруоннан игин дьарыктатааччыбын. Билигин бэйэлэрэ сатаабыттарынан тиктэллэр, кыра кыыһым оҕуруоланар да.
Былырыыҥҥыттан банкетный саала олоххо киллэрбиппит. Эдьиийбит көһөн барбытын кэннэ, дьиэ таах иччитэх туруо дуо диэммит банкетный саалата арыйахха диэн толкуй киирбитэ. Лена Кимовнаны кытары толкуйбутун тута олоххо киллэрбиппит. Дьиэ иһин барытын сууйан — тараан, иһит — хомуос атыылаһан, түннүктэр остуораларын бэйэбит тигэн, дьиэбит дьоннору көрсөргө бэлэм буолбута. Дьиэбит үлэҕэ киириэҕиттэн элбэх киһи бырааһынньыктаата. Юбилейдар да буолан ааспыттара, корпоративтар да, төрөөбүт күннэр да, чэ ити курдук араас бырааһынньыктар буолан ааспыттара. Дьоннор дэлби сөбүлээбиттэр, астыммыттар. Бэйэм да санаабар маннык дьиэ наадалаах дии саныыбын. Дьиэ иһигэр икки саала баар, банкетнай уонна кыра саала. Киирбит харчыннан дьиэ итиитин — уотун төлүүбүт.
Бу курдук амарах санаалаах Зинаида Спиридоновна дьоҥҥо — сэргэҕэ бэйэтэ тугу билэринэн — сатыырынан олохтоохторго “Узоры Анабара” дьиэтигэр үллэстэр. “Узоры Анабара” дьиэлэрин Лена Кимовнаны кытары эмиэ бэйэлэрин күүстэринэн — кыахтарынан оҥостон олоххо киллэрэн буор босхо дьону үөрэтэр, сүбэлиир. СВО кытта сылдьар уолаттарбытыгар бэйэтин санаатынан элбэхтэ көмөлөһөн турардаах. Дьон туһугар ахсаабат кыһамньылаах сыһыан киһиэхэ эрэ барытыгар бэриллибэт.