Бэс ыйын 12 күнэ Анаабыр оройуонун олоҕор биир үтүө, кэскиллээх күнүнэн бэлиэтэннэ. Айылҕабыт баайын харыстааһын, өрүспүт баайын хаҥатыы сыаллаах-соруктаах, “Анаабыр алмаастара” хампаанньа экология бырагырааматын чэрчитинэн, Анаабыр өрүс сүүрүгэр 1 миллион 747 тыһыынча 356 устуука чыыр балык ыамата ыытылынна. Бу — хотугу дойдубут эйгэтин тупсарыыга, кэлэр көлүөнэҕэ кэрэ кэскили хаалларыыга улахан хардыы.
Бу кэрэ-бэлиэ түгэҥҥэ Анаабыр оройуонун сайдыытыгар кыһанар дьоһун дьон муһуннулар:
Улуус баһылыгын эбээһинэһин толорооччу Ольга Федоровна Тимофеева-Терешкина, Сааскылаах нэһилиэгин баһылыга Алексей Петрович Николаев, «Анаабыр алмаастара» хампаанньа экологическай хонтуруоллуур бөлөҕүн салайааччыта Саргылана Анатольевна Лукина, Анаабыр инспекциятын государственнай экологическай хонтуруол начальнигын эбээһинэһин толорооччу Күннэй Федоровна Портнягина, Чернышевскайдааҕы балык собуотун директорын солбуйааччы Айаал Григорьевич Егоров уонна Росрыболовство государственнай инспектора Алексей Леонидович Шихов.
Өбүгэбит үйэлээх сырдык үгэһин тутуһан, ханнык да улахан дьыала саҕаланыан иннинэ сир-дойду иччитин аһатыы уонна эбэни айхаллааһын сиэрэ-туома ыытылынна. Гавриил Тобонов Эбэ иччитигэр уонна айылҕа күүстэригэр анаан сылаас алаадьы уурда, сырдык алгыс тылларын иэйэн туран эттэ.
Балык ыамата өрүс уутугар киириитэ — кэрэ көстүү. Төһө да курууппа курдук кыралар, кинилэр кэлэр кэмҥэ Анаабыр өрүһүн сүрүн баайа буолан, хотугу дойдубут эйгэтин байытыахтара.
Бу курдук, “Анаабыр алмаастара” хампаанньа көҕүлээһининэн, дьоллоох дьыала оҥоһуллунна. Экология туһугар кыһаллыы, айылҕаны харыстааһын — бу бүгүн эрэ буолбакка, үйэлэр тухары салҕанар кэрэ үгэс. Саха дьоно өрүү эбэбитин, өрүспүтүн харыстыыр, киниэхэ махтана сылдьар үтүө үгэстээхтэр. Анаабыр өрүспүт эйгэтэ эһиил да, өссө кэлэр үйэлэргэ да балыктаах, чэгиэн туруктаах буоларыгар бу үлэ улахан тирэх буолара саарбахтаммат.
Бу үтүө үлэ бүгүн эрэ саҕаламматах, уонна соҕотох кэрчик кэминэн муҥурдаммат. Экология туруктаах буоларын туһугар систиэмэлээх күүстээх үлэ ыытыллыбыттара:
• 2022 сыллаахха — хотугу дойду уутун күндү балыга — 1 мөлүйүөн күндүөбэй ыамата Анаабыр өрүһүгэр ыытыллыбыта.
• 2025 сыллаахха — 1 мөлүйүөн 472 тыһыынча чыыр балык ыамата Эбэ хотуҥҥа ыытыллыбыта.
Аны ити кыраны кытта муҥурдаммакка, «Анаабыр алмаастара» хампаанньа Анаабыр улууһун кэрэ-мааны күөллэрин уутун эмиэ балыгынан хааччыйыыга, балык ыаматын көһөрүүгэ киэҥ былааннары торумнуур. Маннык хабааннаах комплекснай уонна дириҥ ис хоһоонноох үлэ улууска өрүс систиэмэтин эрэ буолбакка, хотугу дойду уутун бүтүн экосистиэмэтин күүһүрдүө, айылҕа бэйэтин кыаҕынан чөлүгэр түһэригэр сүүнэ кылаат буолуоҕа.
Анаабыр улууһун олохтоохторо экологияҕа маннык улахан, амарах сыһыаннарын иһин “Анаабыр алмаастара” хампаанньаҕа барҕа махталларын тиэртилэр.