«Алмаас» култуура киинигэр Яна Спиридонова салайыылаах «Анаабыр Алмаастара» образцовай үҥкүү ансаамбыла народнай аатын «Муммут тугутчаан» үһүйээнинэн үрдүк таһымнаахтык көмүскээтэ. Дьокуускай куораттан, «Саха» көрдөрөр-иһитиннэрэр хампаанньаттан, ыҥырыылаах ыалдьыттар тэрээһини видеоҕа уһулан, куоракка хамыыһыйаҕа ыыттылар.
Туруоруу ис хоһоонун кылгатан сырдатар буоллахха, таба оҕото ыстаадатыттан тэйэн мунан хаалар, уһун суолун устун араас кыыллары,омуктары көрсөн суолун ыйдарар. Бу барыта үҥкүү көрдөрүүтүнэн. Хас биирдии нүөмэр киһи эрэ хараҕын үөрдэр. Хоту дойду хаардаах муус дойдутунан барытынан эргитэн аҕаллылар. Араас хамнаныылаах кэрэ үҥкүүлэрэ бииртэн биир дьэрэкээн уотунан, муусуканан доҕуһуоллатан киһи сүргэтэ көтөҕүллэр. Бу киэһэ араас көрүҥүн, хамсаныытын, үҥкүү кутун-сүрүн биир тыынынан киһи астына көрөр дьоһун түһүлгэтэ буолла.
Бу айдарыылаах үлэни ис сүрэҕиттэн анаан бэлэхтээбит киһибит Яна Николаевна буолар. Үҥкүү кутун-сүрүн иэйиитин, олоҕу көрүүтүн, бэйэтин ис туругун, айылҕаны кытта ситимин, өбүгэ төрүт үгэһин ылыныытын көстүүтэ – кини, бу маны барытын үҥкүү хамсаныытыгар көрдөрөн, үҥкүү эйгэтигэр баһаам кылаатын киллэрэн, ураты айылҕалаах, күннээх-дьыллаах сиргэ-уокка олохсуйбут өбүгэлэрбит үгэстэрин, төрүт култуураларын умнубакка, үүнүү-сайдыы суолун тутуһан үлэлии-хамсыы сылдьар. Эдэр сааһыттан үҥкүү таҥаратыгар бүттүүн бэриммит, сүүрбэттэн тахса сыл билиитин, талаанын биэрбит киһи буолар. Бу сыллар усталаах-туораларыгар төһөлөөх элбэх оҕо-ыччат дьону уһуйан, улахан да дьону үөрэтэн кэлбитин, үлэтигэр уонна айылҕа биэрбит дьоҕурун бэлиэтин барҕа суруктар, туйгун ааттара кэрэһэлииллэр.
— Былааннаабытым курдук барыта туолла дии саныыбын. Кэнсиэрпит икки күнү супту буолла. Элбэх киһи билиэккэ тиксибэтэх этэ, ол иһин кинилэр көрдөһүүлэринэн, сарсыҥҥы күнүгэр эмиэ кэнсиэртээтибит. Бастакы күммүтүгэр оҕолор аһары долгуйан дуу, сыыһалар бааллар курдук этэ. Иккис күммүтүгэр туруоруубут олуһун табылынна дии саныыбын. Оҕолор олус маладьыастаатылар, куораттан да бэйэлэрин баҕа санааларынан устудьуоннар кэлбиттэрэ кэнсиэргэ кыттаары. Урукку выпускниктарым эмиэ бэйэлэрин баҕа санааларынан кэлэн үҥкүүлээтилэр. Быйыл улахан дьон састааба үлэҕэ киирдэ. Саамай ыарахана диэн үлэ бириэмэтэ, үөрэтиитэ, тоҕо диэтэр мин урут уруккуттан хаачыстыбаны олус ирдиибин. Испэктээкил туруоруутугар тугу эрэ уратытык оҥорбут киһи диэн санаалаах этим. Испэктээкил диэҥҥэ бастакы холонуубут буолар. Барыта этэҥҥэ ааста дии саныыбын, көрөөччүлэргэ туруоруу ис хоһоонун тиэртибит диэн эрэнэбин, — диэн Яна Николаевна санаатын үллэһиннэ.
Түгэнинэн туһанан, тэрийээччилэргэ, бырайыак ааптарыгар — Яна Николаевна Спиридоноваҕа, “Анаабыр Алмаастара” үҥкүү ансаамбылыгар махтал тылларын аныыбыт, өссө да сонун бырайыактар олоххо киирэ турдуннар, дьон сэҥээриитин ылыан ыллыннар!