Анаабыр улууһугар сэтинньигэ Дьокуускай куораттан 2-с №-дээх өрөспүүбүлүкэтээҕи балыыһа — суһал мэдиссиинэ пуунуттан хирургтар мобильнай биригээдэлэрэ кэлэрэ былааннанар. Көрдөрүөн баҕалаахтар эрдэттэн суруттараллара ирдэнэр.
Мобильнай биригээдэ эмчиттэрэ улуус олохтоохторугар үрдүк таһымнаах медицинскэй көмөнү оҥоруохтара. Ол иһигэр геморрой, варикоз, холецистит уонна да атын хирург дьайыыта ирдэнэр ыарыы көстөр түгэнигэр, суһал эпэрээссийэ ыытыллыа.
Эбэн эттэххэ, маннык эпэрээссийэ үксүгэр өрөспүүбүлүкэ киин куоратыгар эрэ оҥоһуллар. Онон бу хоту тайаан сытар Анаабыр улууһун олохтоохторугар доруобуйаны тупсарарга сэдэх түгэн буолар.
Эмчиттэр ситиһиилээх үлэлэрэ олохтоохтортон улахан тутулуктаах. Көрдөрүөх иннинэ бэлэмнэнии иитинэн, кииннэммит балыыһаҕа кэлэн тустаах бырааска көрдөрөн, ыарыыны быһаартара турар наадатын тиэрдэбит. Медицинскэй көмөҕө наадыйааччылар испииһэктэрэ оҥоһуллубутун эрэ кэннэ мобильнай биригээдэ үлэтин былаана чопчуланарын тоһоҕолуубут.
Үрдүк таһымнаах хирургтар мобильнай бөлөхтөрө кэлиитин мүлчү тутумаҥ, эрдэттэн суруттарыҥ!
Мария Яроева
Хаартыска: ГТРК «Саха» саайтыттан