Олунньу ый 25 күнүттэн, кулун тутар 6 күнүгэр диэри биһиги бөлөхпүт, Анаабыр национальнай (долган-эбэҥки) улууһун баһылыга Платонов Эдуард Петрович салайааччылаах, улуус “Сугулаан” мунньаҕын депутата, “Арктика” МУП тэрилтэ дириэктэрэ Николай Алексеевич Ранчинскай уонна мин буоламмыт Запорожскай уобаласка, Донецкай уонна Луганскай норуодунай Республикаларга буола турар анал байыаннай дьайыыга биһиги улуустан, бойобуой сорудахтарын хорсуннук толоро сылдьар биир дойдулаах уолаттарбытыгар гуманитарнай көмө илдьэн, сирэй көрсөн, кэпсэтэн кэллибит.
Ол курдук айаммыт Дьокуускайтан Москваҕа көтөр аалынан, онтон салгыы Минеральные Воды куоракка дылы тоҕус чаас көтөн тиийэн, илдьибит гуманитарнай көмө малын барытын массыына сакаастаан грузовой терминалтан ылан, эбиэт кэннэ Ростов-на-Дону куоракка поеһынан алта чаас айаннаан, малбытын сүөкээн массыынабытыгар тиэнээт, түүннэри Мариуполь куоракка эмиэ алта чаас айаннаан гостиницаҕа хонук сирбитин булан, кыратык сынньанаат сарсыҥҥы күн сарсыарда 7 чааска тирэх пууҥҥа тиийэн, таһа5аспытын барытын наардаан-сааһылаан эбиэт кэннэ тарҕатар анал үлэбитин саҕалаан барбыппыт. Суолбут ыраах, сэрэхтээх, онон биһиэхэ анаан Амматтан сылдьар Швердин Василий диэн саҥалаах-иҥэлээх, киирбит-тахсыбыт, сытыы сирдьит уолу анаабыттара. Хас куоракка, дэриэбинэҕэ киириигэ-тахсыыга блокпостар тураллар. Автоматтаах байыаннай уолаттар тохтотон, паспорбытын бэрэбиэркэлииллэр, хантан сылдьарбытын, туох сыаллаах-соруктаах кэлбиппитин барытын туоһулаһан бэрэбиэркэ ыыталлар. Кэлин сахаларбытын билэн бараннар, үөрэ далбаатыы атаараллар-көрсөллөр, тохтоон “Оо, легендарные Якуты!”-диэн киэн туттардыы саҥаран, эҕэрдэлии көрсөллөрүн хас биирдиибит киэн, тутта долгуйа иһиттибит. Запорожье хайысханан, Часов Яр бөһүөлэгэр тиийэрбитигэр өстөөх дроннара элбээн, РЭБ антидроммут биир кэм чыһыыран олороро. Кэлэн иһэн Луганскай Республикатыгар аатырбыт, киһи долгуйар, сүгүрүйэр “Саур-Могила” мемориальнай комплекска сылдьан ытыктабылбытын биллэрэн сүгүрүйэн аастыбыт!
Бу барыыга улууспут тэрилтэлэрэ, дьоно-сэргэтэ, олохтоохторо, төрөппүттэр үтүө санааларынан хомуйбут астарын-үөллэрин, дууһаларын ууран туран астаабыт бэрэскилэрин, бултаабыт тоҥ балыктарын, сибиэһэй таба этин (барыта тон ирбэккэ тиийбитэ), хатарыллыбыт дьуукала, эт, “Астык” ас тэрилтэтэ оҥорон бэлэмнээбит минньигэс астарын (плов, таба, тайах, уомул эттэриттэн ыһаары, собо пакеттаах ухаата уо.д.а.), улууспут Сааскылаах, Үрүҥ-Хайа нэһилиэктэрин кэрэ анардарын күүстэринэн, сылаас илиилэринэн тигиллибит таҥас-сап, өрүллүбүт маскировочнай сетка, анал сэриигэ туттуллар матасыыкыл, электрическэй станцийа, тепловизор, дрону утары үлэлиир, сэрэтэр РЭБ илдьэн уолаттарбытыгар туттартаатыбыт.
Улуус дьаһалтата буойуттарбытыгар анаан анал маскировочнай тигиллибит үрүһээккэ саамай наадалаах танас-сап: «OMSA» фирма наскылара, уларытта сылдьан кэтэргэ анаан ис таҥастар, сылаас уонна чараас кэтиллэр термобелье комплегын, футболка, соттордор, аптечка, улууспут былааҕын, икки көрүҥ Харысхал, саха быһаҕа, кааскаҕа кэтиллэр “Армитек” омук фонарига, инчэҕэй салфетка, тиис суунар паасталары, щеткалары, илии, таҥас суунар мыылалар, шампуннар, уларыттар сылаас, чараас куопталар, бүрүнэргэ анаан плащ бүрүөһүн таҥас, улуус гимнаазийатын, оскуолаларын үөрэнэээччилэрин буойуттарга өрө көтөҕүллүүлээх ис хоһоонноох суруйбут суруктара, уруһуйдара барыта угуллан хас биирдиилэригэр долгутуулаах быһыыга-майгыга туттарыллынна.
Уолаттар дойдуларыттан кэһиилэрин долгуйа күүппүт буолан илиилэригэр тутаат сирэйдиин-харахтыын сырдаан «Оо, дойдубут тоҥ балыгын, этин, бэрэскитин амсайар буоллубут!”- диэн харахтарыгар үөрүү кыымын сахпытын көрөр олус да долгутуулаах тугэн буолан биэрбитэ, үлэбит сиппитин туоһута буолбута туохха да тэҥнэспэт буоллаҕа. Саамай үөрбүппүт диэн олох хаһан да тиийбэтэх, сылдьыбатах түгэх, ыраах Симферополь хайысхатынан баар Приморский Посад диэн сиргэ тиийэн бэйэбит уолбутугар анаммыт малын кытта тепловизор тиэрдибиппит буолар. (биллэр өйдөбүлүнэн байыастарбыт ааттарын, ханна сылдьалларын суруйбатым).
Түгэнинэн туһанан махтаныам этэ улуус баһылыгар Эдуард Петровичка Платоновка, кини тус бэйэтинэн бу курдук эппиэтинэстээх сорудахха миэхэ эрэнэн, үлэбиттэн, “Хотугу Аэропортар” ФКТ генеральнай дириэктэрин Волков В.В. кэпсэтэн, сөбүлэҥ түһэрсэн утары баран Анаабырбыт улууһун бөлөҕөр киирэн, үлэлээн-хамсаан, кыра да буоллар Кыайыы туһугар бэйэм сэмэй кылааппын киллэрсибиппэр. Сорохтор баҕар саныыргыт буолуо, Эдуард Петрович бу сотору-сотору, бэһис төгүлүн Анал байыаннай дьайыыга баран кэллэ, тугу гынарый диэн? Дьэ оннук буолбатах! Улууспут баһылыга эдэр-сэнэх буолан, дьону-сэргэни, үөһээҥҥи салалтаны кытта уопсай тыл булан, Правительствоны кытта сөптөөх кэпсэтиитинэн, дьаһалынан уһун унньуктаах айан табылынна диир оруннаах. Хас сырыытыгар бардаҕын аайы атын хайысханан бу иннинэ гуманитарнай көмөҕө тиксибэтэх уолаттарга хас биирдиилэригэр тиэрдэр соруктаах утуйар уутун, аһыырын да умнан туран сүүрэр-көтөр. Бу сырыыга ханна тиийдибит да кими баҕарар кытта уопсай тыл булан, бары уолаттар үөрэ-көтө көрсөллөрө, доҕотторо куруук сүбэлииргэ-амалыырга күнүстэри-түүннэри бэлэмнэрэ үөртэ да, сөхтөрдө да! Ханна тиийиэхтээх сирбитигэр төһө да сылаалаах айантан сылайдарбыт, барытыгар эдэр баьылыкпыт ким хайа иннинэ түргэн сырыынан быһаарсан, поезка, гостиницаҕа билиэт, хонор сир була охсон туох да ыараханы көрсүбэккэ, биир санаанан салайтаран, тэтимнээхтик үлэлээн-хамсаан, уолаттарбытын көрсөн икки өттүттэн үөрэн-көтөн, тиэрдиэхтээх малбытын барытын толору хаачыстыбалаахтык тиэрдэн, санаабыт туолан, сыалбытын ситиһэн кэллибит.
Бу сырыыга сылдьыбыт бөлөх уонна анал байыаннай дьайыыга сылдьар уолаттарбыт ааттарыттан махтаныам этэ гуманитарнай көмөнү тиэрдэрбитигэр бары кыттыспыт хас биирдии олохтооххо, оҕолорбут тустарыгар кыһаллан түүннэри-күнүстэри ас астаан, таҥас-сап, маскировочнай сетка тигэн-өрөн, харчынан көмөлөспүт, бу улахан суолталаах үлэҕэ туора туран хаалбакка биир санаанан илии-атах, сүбэ-ама, көмө буолбут бары үтүө санаалаах биир дойдулаахтарбытыгар!
Уолаттарбытынан биһиги киэн туттуох тустаахпыт, кинилэр бары- биһиги кэммит Геройдара, төһө да уоттаах киирсиигэ сылдьан хастыы да бааһырыылаахтарын үрдүнэн санааларын түһэрбэттэринэн, хас биирдиилэрэ бойобуой мэтээл, уордьан кавалердара буолалларынан!
Аны сотору кэминэн уолаттарбыт, хотугу хорсун хоһууннарбыт- Кыайыы көтөллөөх, сарсыҥҥы эйэлээх олоххо эрэллээх, төрөөбүт дойдуларыгар этэҥҥэ эргиллэн кэлиэхтэрэ диэн бигэ эрэллээхпит! Биһигини кытта тэҥҥэ эйэлээх, дьоллоох олоҕу уһансыахтара турдаҕа. Оттон улуус олохтоохторо тумсэн, баьылыкпыт Эдуард Петрович тула биир сомо5о буолан, биир санаанан салайтаран эйэлээх олох түстэнэригэр, салҕыы сайдыы суола салалларын туһугар үлэлиэҕиҥ-хамсыаҕыҥ диэн ыҥырыаҕы баҕарыллар.
Сөпкө эпииттэр эбит дуо? Биһиги өбүгэлэрбит!
Киһи олоҕо, саха балаҕанын түннүгүн нөҥүө
Чыычаах көтөн ааһарын курдук түргэн-диэн?
Ол олох!
Онтон ким эрэ эдэригэр сэрии толоонугар,
Ким бохсоруйан кырльан баран айылҕатынан!
Үйэлэргэ сүппэттик, өйбөр-сүрэхпэр хаалбыккыт!
Хааллылар кэннибэр сайыспыт харахтар,
Эдэркээн туундара хоһуун уолаттара!
Хааллылар Мохсоҕол тыйыс харахтар.
Өстөөҕү өһөрөр, Кыайыыга эрэллээх
Хоту дойдум модун Ньургуннара!
Киэҥ нэлэмэн Украина буолаҕар
Сарсыҥҥы күҥҥэ Саргылаах
Кыайыыга кытаанах дьулуурдаах
Биһиги хотугу, герой Хотойдорбут
Кимиэхэ да тэҥнэммэт
Эр санаалаах, харыстыыр Аанньалларбыт!
Толбон