Дьокуускайга соторутааҕыта “Урикит” диэн хоту уонна Арктика улуустарын эдэр ыччатын сүлүөтэ бэрт сэргэхтик буолан ааста.
Анаабырдар ыччаттара бу тэрээһиҥҥэ чаҕылхайдык кыттан, бары күрэстэргэ инники күөҥҥэ түһэн дьоннорун-сэргэлэрин үөртүлэр.
Ол курдук ыччат долгуйа кэтэспит тэрээһинэ “Сила рода” диэн турбаазаҕа хотугу норуоттар ураты кэрэ ырыаларынан, эрчимнээх үҥкүүлэринэн саҕаламмыт. Салгыы хотугу дэгит күрэскэ ох курдук оҥостон, бэлэмнэнэн кэлбит спортсменнар күрэхтэһиилэрэ болҕомтону тардыбыт. Онтон хотугу норуоттар олохторун-дьаһахтарын көрдөрөр, кэпсиир түһүлгэ күрэс болҕомтону тардыбыт. Бу күн ырыа-тойук, үҥкүү-битии, күөн күрэс арааһа, табанан, буранынан хатааһылааһын, сибиэһэй салгыҥҥа көрү-күлүүнү көҕүлүттэн тутуу эдэр дьоҥҥо умнуллубат бэлиэ түгэнинэн буолбут.
Яна Боярская: “Анаабырдар улууспутун ааттаттыбыт”
—Анаабырдар улууспутун ааттаттыбыт. Онон наһаа үөрдүбүт. Ол курдук, хотугу дэгит күрэскэ Вадим Туприн бастаата. Түһүлгэ куонкуруһугар инники күөҥҥэ түстүбүт. Манна национальнай таҥаспытын-саппытын кэтэн сылдьыбыппытын, түһүлгэбитигэр долгаанныы ыллаабыппытын сэҥээрдилэр. Маны сэргэ, баай-талым астаах-үөллээх остуолбутугар кэриэрдии бурдугу сэҥээрдилэр. Бу буһарыллыбыт бурдугу чэйгэ кутаҕын. Тоҥмуту аһарарга көмөлөһөр, күүс-сэниэ биэрэр, тотоойу. Өссө таба этиттэн бэрэскини наһаа сөбүлээтилэр. Аспыт-үөлбүт арааһа элбэҕэ дьүүллүүр сүбэни сөхтөрдө.
Онтон кыргыттар күрэстэригэр Орто Халыматтан, Өлөөнтөн, Эдьигээнтэн, Усуйаанаттан барыта алта кыыс кытынна. Сүлүөтү сэргээн-сэҥээрэн Үөһээ Бүлүү кыыһа бу күрэскэ кыттыыны ылбыта биһигини барыбытын үөртэ.
Мин бу күрэскэ кыттан 1 вице-мисс буоллум. Миэхэ бэйэни билиһиннэрии долгутуулаах буолла. Көрөөччүлэр иннилэригэр тахсан баран, тугу саҥарыахтаахпын умнан кэбистим. Инньэ гынан, дьүөгэлэрбин кытта кэпсэтэр курдук сананан туран, хайдах табылларынан бэйэбин билиһиннэрдим. Маныаха урукку өттүгэр куонкурустарга, кэнсиэргэ кытта үөрэммитим көмөлөстө дии саныыбын. Онтон талааны көрдөрүүгэ Анаабыр кыргыттара көмөлөөн долгаан үҥкүүтүн туруорбуппутун көрдөрдүбүт.
Наартаны үрдүнэн ойууну ыарырҕаттым. Алтата эрэ ойдум. Биир успуорт маастарыгар кандидат кыыс 80-тан тахсата ойон барыбытын сөхтөрдө. Күрэскэ кыргыттар бары бэлэмнэнэн кэлбиттэрэ көрүөххэ олус үчүгэй, — диэн кэпсиир Яна.
Вадим Туприн: “Успуордунан дьарыктаныы күрэхтэһиигэ көмөлөһөр”
Салгыы хотугу дэгит күрэс кыайыылааҕын, СӨ успуорт маастарын Вадим Туприны кытта кэпсэттим.
Вадим ХИФУ ИФКИС 1 кууруһугар үөрэнэр. Манна даҕатан эттэххэ, Табаһыт күнүгэр ыытыллар “Священный мой олень” диэн тэрээһиҥҥэ хотугу дэгит күрэскэ быйыл Вадим эмиэ бастаан турар.
—Күрэхтэһиигэ 12 спортсмен кытынна. Уолаттар бары үчүгэйдик бэлэмнэммиттэр. Холобур, Егор Потаповы (Үөһээ Бүлүү), Петр Прудецкайы (Верхоянскай), уо.д.а. дьон-сэргэ киэн тутта ааттыыр спортсменнара.
Бу күрэскэ тоҥуу хаарынан 60 м. сүүрдүбүт. Ноори, наартаны үрдүнэн ойуу болҕомтону тартылар. Наартаны үрдүнэн ойуга 2 мүнүүтэ иһигэр төһө элбэҕи ойорго күрэхтэстибит. Көрдөрүүм – 141. Бу күрэхтэһиилэр түмүктэринэн бастакы миэстэни ыллым. Маны сэргэ туспа маамыктаны быраҕыыга бастаатым.
Уопсайынан, успуордунан дьарыктаныы күрэхтэһиигэ көмөлөһөр дии саныыбын, — диэн этэр Вадим Туприн.
* * *
Анаабырдар эдэр ыччаты түмэ тардыбыт улахан тэрээһиҥҥэ түмсэн, сомоҕолоһон, сыал-сорук туруорунан кыттаннар, кыайыы көтөллөннүлэр. Кинилэр бу курдук салгыы атын тэрээһиннэргэ эмиэ ситиһиилээхтик кыттар туһугар бары кыһамньыларын уураллар.
Сардаана Баснаева