Нэһилиэктэргэ бэйдиэ сылдьар ыт кыһалҕата сытыытык турар. Босхо сылдьар ыттар дьоҥҥо-сэргэҕэ, ордук оҕолорго, кырдьаҕастарга улахан кутталы үөскэтэллэр. Ол курдук, бу сыл устата оройуон үрдүнэн 8 киһи ыкка ытыртаран балыыһаҕа көрдөрүммүт. Сорох эмсэҕэлээччи быраас көмөтүгэр наадыйбатах буолуон сөбө сабаҕаланар. Кыһалҕаны быһаарар сыалтан улуустааҕы дьаһалтаҕа мунньах буолла.
Мунньахха улуус дьаһалтата, ветеринарнай управление, полиция, биир кэлим диспетчерскэй сулууспа, МАУ «Саскылах» уо.д.а. тэрилтэ салайааччылара, нэһилиэк баһылыктара кыттыыны ыллылар. Кэпсэтиини Анаабырдааҕы тыа хаһаайыстыбатын управлениетын салайааччытын эбээһинэһин толорооччу Туяра Николаева салайан ыытта.
Биллибитинэн, Үрүҥ-Хайаҕа Өлөөн улууһуттан инспектор тиийэн, рейдэ тэриллэн, хаһаайыннаах ыттары испииһэктээн күүстээх хонтуруолга ылбыттар. Нэһилиэк баһылыга Егор Спиридонов этэринэн, сорох ыттары суох оҥорбуттар, сорохтору баайбыттар. Нэһилиэккэ приют суох буолан, хаһаайына суох ыттары кыһыл кыраасканан бэлиэтииллэр. Онтон хаһаайыннааҕы анал чиибинэн билэн, 3 тыһыынча 500 солкуобайга ыстыраап ууруллар.
МАУ «Саскылах» тэрилтэ салайааччытын солбуйааччы Ньургун Попов үөрэх саҕаланыаҕыттан 20-тэн тахса ыты туппуттарын, өссө да үлэ бара турарын эттэ.
Уураахха саҥа уларыйыылар – ый аайы ыт тутуута
Мунньахха 2023 сыллаахха тахсыбыт 289 нүөмэрдээх уураахха саҥа уларыйыылар киирбиттэрин туһунан кэпсэттилэр. Эрдэ ыты кыбаартал аайы тутар буоллахтарына, билигин ый аайы туталлара ирдэнэр. Туяра Николаева МАУ «Саскылах» үлэһиттэрин бу уурааҕы кытаанахтык тутуһалларыгар ыҥырда. Ону сэргэ, ветеринария үлэһиттэрин ыттары маркировкалааһыҥҥа үлэлэрин күүһүрдэллэригэр сүбэлээтэ.
Хаһаайыттар эппиэтинэстэрэ
Олохтоох дьаһалта да, тустаах сулууспа үлэһиттэрэ да «Ыккытын баайыҥ», «Хаһаайыттар эппиэтинэстээх буолуҥ» диэн улуус хаһыатынан, куйаар ситиминэн өйдөтөр, быһаарар, сэрэтэр үлэлэри кэмиттэн кэмигэр ыыталлар да, олохтоохтор дьоһуннаахтык ылымматтара хомолтолоох.
Ыты иитэр дьон эппиэтинэстэрин өйдөөн, бары ирдэнэр быраабыланы тутуһаллара наада. Онтон нэһилиэнньэ өттүттэн дьоҥҥо-сэргэҕэ, чуолаан оҕо аймахха куттал суоһаабатын туһугар өйөбүл, көмө буолуу ирдэнэр. Хас биирдии ыал эппиэтинэһин өйдөөн туран, иитэр кыылын баайдаҕына, бу кыаллар боппуруос буоларын өйдүөх тустаахпыт.
Хаһаайыттар ыккытын баайыҥ, тулалыыр эйгэҕэ болҕомтолоох, эппиэтинэстээх буолуҥ, харыстабыллаахтык сыһыаннаһыҥ!
Мария Яроева