Муус устар 8 күнүттэн 14 күнүгэр диэри Анаабыр улууһугар оҕо аймах уйулҕатын харыстыыр, кинилэр кэскиллээх сайдыыларын түстүүр улахан суолталаах үлэ ыытыллынна. Өрөспүүбүлүкэтээҕи уйулҕа-педагогика өттүнэн арыаллыыр мэтиэдичэскэй кииниттэн кэлбит үрдүк таһымнаах исписэлиистэр нэдиэлэ устата Сааскылаах уонна Үрүҥ Хайа олохтоохторун кытары иһирэхтик алтыстылар.
Бу сырыы аҥардас үлэ эрэ буолбакка, кэлэр көлүөнэ туругун тупсарыыга, кинилэр олоххо бэйэлэрин миэстэлэрин сөпкө булалларыгар туһуламмыт айар миссия буолла.
Арктика тыйыс айылҕатын аахсыбакка, оҕо аймах уйаҕас уйулҕатын арыаллыырга күүс-көмө буолар сыаллаах икки исписэлиис үлэлээтилэр:
Стручкова Елизавета Петровна — бэйэтин идэтин толору баһылаабыт, дириҥ билиилээх педагог-психолог, уйулҕа уонна социальнай-педагогика өттүнэн арыаллааһын отделын мэтиэдиһэ;
Чемезова Карина Игоревна — оҕо сайдыытын эрдэттэн арыйар, тыл-өс култууратын сайыннарар дэгиттэр талааннаах учуутал-дефектолог, логопед.
Исписэлиистэр графиктара олус киэҥник ааста.
Бу туһунан психологтары кытары сэһэргэстибит.
— Биһиги “Сокуоннай саастарын ситэ илик оҕолорго быраап кэһиитин сэрэтии” диэн федеральнай бырагыраама чэрчитинэн үлэни ыыттыбыт. Кэпсэтии сүрүн тиэмэлэрэринэн, олоххо саамай суолталаах хайысхалары таарыйдыбыт.
Сүрүҥ сыалбыт — сорукпут оҕолору кытары үлэлээһин буолар. ЕГЭ уонна ОГЭ кэмигэр оҕо психологическай туругун хайдах туруктаах оҥорор туһунан практическай сүбэлэр бэриллиннилэр. Учууталларга, уһуйаан иитээччилэригэр “Эмоциональнай умайыы” синдромун сэрэтиигэ трениннары ыыттыбыт. Оҕо аймаҕы харыстааһын: Оҕоҕо кырыктаах сыһыаны уонна аутоагрессивнай быһыыны-майгыны сэрэтиигэ дириҥ ис хоһоонноох семинардары тэрийэн ыыттыбыт. Уһуйааннары кэрийэ сылдьан кырачааннар тылларын — өстөрүн сайдыытын боппуруотсарыгар элбэх оҕону кытары үлэлэстибит, төрөппүттэргэ консультация биэрдибит.
Муус устар 11 күнүттэн 14 күнүгэр диэри Үрүҥ — Хайаҕа баран учууталлары, төрөппүттэри, оҕолору кытары эмиэ бу курдук үлэ ыыттыбыт.
РМЦППС кииниттэн Анаабырга үс сыл буола буола кэлэбит. Бастаан кэлээт Үрүҥ — Хайаҕа барыахтаахпытын халлааммыт туругуттан хаалан Сааскылаахха үлэбитин саҕалаабыппыт.
Уопсайа оҕо төрөппүтүн кытары сыһыаннара тапсыбат, оҕо үөрэниэн баҕарбат уонна үөрэхтэрин кыайбат кыһалҕалаах оҕолор төрөппүттэринээн индивидуальнай кэпсэтиигэ сырыттылар.
Уопсай сыалбытын толору ситиһиилээхтик ситистибит. Уопсайа 60-тан тахса педагогу хабан үлэлээтибит, төрөппүттэр аҕыйах да буоллар индивидуальнай көрсүһүүгэгэ сырыттылар оҕолорунаан.
Мин бэйэм Анаабыр Үрүҥ Хайатыгар улааппытым, оскуолабын бүтэрбитим. Онон төрөөбүт дойдубар исписэлиистии кэлиим — мин тус бэйэбэр улахан үөрүү! Анаабырым дэлби сайдыбыт, кэҥээбит. Дьонум-сэргэм олус итиитик-истиҥник көрүстүлэр, сүрэхпэр наһаа үчүгэй өйдөбүллэр хааллылар. Сааскылаах уонна Үрүҥ Хайа оскуолаларын үлэһиттэригэр, олохтоохторугар барҕа махталбытын тиэрдэбит”.
Сырыы түмүгүнэн Елизавета Петровна хас биирдии төрөппүккэ ис сүрэхтэн тахсар сүбэлэрин биэрдэ:
— ”Оҕоҕутун кытары өрүү кэпсэтиҥ, кини иэйиитин истиҥ. Күннээҕи дьарыгын интэриэһиргээн, тэйиччи тутумаҥ. Оҕо күнү супту гаджетка олордоҕуна, кини ситэ сайдыбат. Ону айылҕаҕа сылдьыынан, булка-акка сибээстээһининэн солбуйуҥ. Оҕо инники идэтин сөпкө таларыгар көмөлөһүҥ, профориентационнай үлэни күүһүрдүҥ. Бэйэҕит уонна оҕолоргут туругун өрүү кэтээн көрө сылдьыҥ”.
— диэн үлэ хайдах барбытын туһунан Елизавета Петровна үлэтин сырыытын түмүктээтэ.
Бу сырыы Анаабыр оҕо аймаҕар, төрөппүттэригэр уонна педагогтарыгар саҥа күүс, эрэл уонна билии кыамын биэрдэ.