Бу күннэргэ Сааскылаахха «Алмаас» култуура киинигэр нэдиэлэ аайы ыытыллар «Сверкай алмазами, Победа» холбоһук күрэх-бэстибээл кэнсиэрэ ыытылынна. Анаабырдааҕы экология надзорун судаарыстыбаннай инспекциятын, улуустааҕы гимназия, “Аэропорты Севера” хампаанньа үлэһиттэрэ уонна оҕо этин-сиинин сайыннарар оскуола тириэньэрдэрэ кыттыгас сонун киэһэни тэрийдилэр.
Дьоро киэһэҕэ сахалыы матыыбынан дойду, норуот иһин олохторун толук уурбут буойуттары ахтан, кинилэр Ийэ дойдуга бэриниилээх буолуу үтүө холобура буолбуттарыгар махтана сүгүрүйдүлэр.
Кэнсиэр «Россия моя» диэн ырыаны ньиргиччи толорууттан саҕаланна. Салгыы «Тыыннаахтар умнубат сыллара» ырыа көрөөччүлэри долгутта. Ол кэннэ Гавриил Толбонов «Мин мантан сэриигэ барбытым” диэн ырыатынан театрализованнай дьүһүйүү буолла. Манна дьиэ кэргэн уолаттарын уоттаах сэриигэ атаарар түгэнэ олус итэҕэтиилээхтик көстөн, ырыаны ситэрэн-хоторон биэрдэ.
Туприна Камилия убайын сэриигэ атаарбытын туһунан уустаан-ураннаан ааҕан, көрөөччүлэри олус долгутта. Эр дьоннор ансаамбыллара уос номоҕо буолбут «Хайыһар» ырыанан көрөөччүлэр биһирэбилин ыллылар. Салгыы сахаттан бастакы Сэбиэскэй Сойуус дьоруойа Федор Попов туһунан уонна «Көрсүһүү» диэн ырыалары кэрэ аҥардар ансаамбыллара толордо.
«Мин биллэрэбин” диэн ырыаны тириэньэрдэр ансаамбыллара ыллаата. Салгыы чороон тутуурдаах сахалыы үҥкүү, тойук сонун көстүү буоллулар. Кыайыы вальса үҥкүүлэнэн, дьон болҕомтотун тарта. Кэнсиэри араас омуктар үҥкүүлэринэн түмүктээтилэр.
Бу тэрээһин санааны көтөхтө, кыайыыга ыҥыран, Аҕа дойдуга тапталы, бэриниилээх буолууну бар дьоҥҥо көрдөрдө. Дьон кэнсиэртэн астынан-дуоһуйан тарҕаста.
«Сверкай алмазами, Победа» күрэх-бэстибээл салҕанар, инникитин даҕаны үгүс киһини түмэрэ күүтүллэр.
Мария Яроева