Бүгүн аан дойдутааҕы Дьиэ кэргэн күнэ. Бу күнү 1994 сылтан саҕалаан сыл аайы ыам ыйын 15 күнүгэр бэлиэтиибит. Бүгүҥҥү дьоруойдарбыт Сааскылаах биир бастыҥ дьиэ кэргэнэ, биэс оҕолоох эдэр ыал Анна Петровна уонна Михаил Александрович Дьяконовтар буолаллар.
Ийэлээх аҕа хардарыта истиҥ сыһыаннарыттан оҕо уйулҕата иитиллэр. Сирдээҕи олоххо бэриллэр бэлэҕи — биэс оҕолорун барыларын атахтарыгар туруоран, бэйэ-бэйэҕэ харыстабыллаахтык сыһыаннаһан, ким тугу сөбүлүүрүнэн дьарыктанан алаһа дьиэ тэринэн олорбуттара 15 сыл буолбут.
Кырдьык, аналлаахтар диэх курдук, иккиэн муус устар 24 күнүгэр төрөөбүт күннээхтэр. Анна 1992 сыллаахха булчуттар дьиэ кэргэннэригэр иккис оҕонон, күүтүүлээх кыыһынан күн сирин көрбүт. Ийэтэ Екатерина Ивановна, аҕата Петр Петрович Платоновтар. Төрөппүттэрэ Улахан-Күөлгэ булчутунан да, табаһытынан да үлэлии хамныы сылдьыбыттар. Оччолорго Улахан-Күөлгэ түөрт кылаастаах оскуола баара. Анна онно бастакы кылааһы бүтэрбит, онтон Сааскылаахха көһөн кэлэн, Сааскылаах орто оскуолатыгар үөрэҕин салҕаабыт.
Михаил 1989 сыллаахха табаһыттар дьиэ кэргэннэригэр бастакы оҕоннон күн сирин көрбүтэ. Аҕата Александр Анисимович Дьяконов стаданнан көһө сылдьан табаларын көрөрө, бултуура. Ийэтэ Маргарита Николаевна чуум үлэһитэ этэ. Тыстан, тирииттэн араас туундараҕа кэтиллэр таҥастары тигэрэ. Билигин даҕаны унтуу, кээнчэ тигэр.
Анна уонна Михаил биир дойдуга улааппыт буоланнар, кыра эрдэхтэриттэн бэйэ-бэйэлэрин кытта билсэллэр этэ. Кэнники, улаатан баран, 2010 сыллаахха харахтарынан хайҕаһан, сүрэхтэринэн таптаһан уруу-аймах тэриммиттэрэ. Билигин кинилэр номнуо биэс оҕолоохтор. Бастакы оҕолоро, эрэллэрэ Мичээр 2011 сыллаахха төрөөбүтэ.
Дьяконовтар биэс оҕолоох дьоллоох дьиэ кэргэн. Мичээр 7-с кылааска, Мичил 6-с кылааска Сааскылаах орто оскуолатыгар туйгуннук үөрэнэллэр. Игирэчээннэр Мичийэ уонна Модун, саамай атаах кырачааннара Чэмэлиинэ “Чуораанчык” уһуйаан иитиллээччилэрэ. Игирэлэр быйыл оскуола боруогун маҥнайгытын үктүүллэр. Аны бу санаатахха, оҕолоро бары сахалыы намчы ааттаахтар эбит. Улахан уол Мичээр оҕо искусствотын оскуолатыгар ырыа куруһуогар дьарыктанар. Араас тэрээһиннэргэ көхтөөхтүк кыттан, дьон биһирэбилин ылар. Бастакы улахан ситиһиитин 2020 сыллаахха “Туундара Туллуктара” күрэххэ кыттан Гран-при үрдүк аатын ылбыта. Быйыл Москва куоракка “Таланты России” күрэххэ кыттан бастакы уонна иккис истиэпэннээх лауреат аатын ылан кэлбитэ. Мичил спорт өттүнэн сайдыылаах буолан футболга сылдьарын ордорор.
Анна нарын-намчы, көрсүө-сэмэй, оҕолоругар холобур буолар мааны хаһаайка, күндү ийэ. Оҕолорун чиэһинэй, хорсун уонна үтүө санаалаах буоларга үөрэтэр. Ийэ киһи быһыытынан оҕолоро үөрэхтээх, үчүгэй үлэһит дьон буолалларын баҕарар. Тоһоҕолоон эттэххэ, дьиэ иһигэр оҕолорун кытта уу сахалыы кэпсэтэллэр, саха сиэринэн иитэллэр.
Михаил табаһыттар уоллара буолан, кыра сааһыттан туундараҕа сылдьарын ордорор. Удьуордарын утумнаан үксүн сайыннары-кыһыннары туундараҕа сылдьан табалыыр, булдунан, балыгынан дьарыктанар, уолаттарын эмиэ каникулларын кэмигэр бэйэтин кытта илдьэ сылдьан айылҕаҕа сыһыарар. Кини туундара киэҥ нэлэмэн ньуурун биэс тарбах курдук билэр. Соторутааҕыта куораттан блогердар кэлэ сылдьыбыттарыгар Михаил туундара олоҕун көрдөрө сирдьитинэн сылдьыбыта.
Ыаллар иллэҥ кэмнэригэр бары мустан киинэ көрөллөрүн сөбүлүүллэр, кыргыттар ас астыыллар. Улахан уолаттар уҥуохтарын сиппит буоланнар дьиэ ис-тас үлэтин кыайаллар. Сайын аайы Улахан-Күөлгэ уруу-аймах буолан сайылыы тахсаллар. Анна туундаратыгар сир астыырын ордук ордорор, туундаратын мэлдьи ахта саныыр. Эрдэ суруйбутум курдук актыбыыс ыаллар диэн мээнэҕэ эппэтэҕим. Дьяконовтар дьиэ кэргэнинээн араас тэрээһиннэргэ көхтөөхтүк кытталлар. 2022 сыллаахха “Байанай” ыһыаҕар “Байанайдаах дьиэ кэргэн” күрэххэ бастакы миэстэни ылбыттара. Онтон да атын тэрээһиннэргэ элбэх ситиһиилээхтэр. Улахан иллээх-эйэлээх дьиэ кэргэҥҥэ чэгиэн туругу, дьолу-соргуну, ситиһиилэри баҕарабыт.
Инникитин даҕаны ситиһии сиэттиһэ, кыайыы кынат буола турдун! Оҕолор этэҥҥэ улаатан, ааккытын ааттатар дьоһун дьон буоллунар!
Ааптар Мария Яроева