Кулун тутар 14 күнүгэр «Алмаас» култуура киинигэр сааскы сырдык күнү арыаллыыр, олус ураты тыыннаах «Гудэйко асаткан» (Кэрэ кыыс) диэн кэрэ уонна талаан күрэҕэ үрдүк таһымҥа буолан ааста. Бу тэрээһин эбээн-эбэҥки норуотун үгэстэрин тилиннэрэр, дьиэ кэргэн сыаннастарын үүнэр көлүөнэҕэ иҥэрэр дириҥ ис хоһоонноох сыаллаах ыытылынна.
Күрэххэ улуус оскуолаларыттан биэс кэрэ-мааны, кыталыктыы кынталдьыйбыт кыргыттар сэттэ тыҥааһыннаах, ол эрээри олус интэриэһинэй түһүмэххэ кэрэлэрин — талааннарын тургутустулар. Кинилэр талааннарын уонна билиилэрин дьоһуннаах дьүүллүүр сүбэ сыаналаата: култуура бэтэрээнэ Зинаида Андросова, эбэҥкилэр ассоциацияларын активиһа Лилианна Назарова уонна бэрэссэдээтэл, «Цветок Ойкюмены – 2021» күрэх кыттыылааҕа Амелия Афанасьева.
Кэрэчээн кыргыттарбыт бастакы «Эне бираканин» (бэйэни билиһиннэрии) түһүмэҕигэр төрүт эбэҥкилии таҥастарынан симэнэн, кимтэн кииннээх, хантан хааннаах буолалларын уу эбэҥкилии тылларынан чобуотук билиһиннэрдилэр. Күөх экраҥҥа өбүгэлэрин историятын, төрүт дьарыктарын туһунан ис киирбэйдик кэпсээтилэр.
Күрэх иккис түһүмэҕэ «Урэды — эгдэн» (талаан арыллыыта) — көрөөччүлэри сөхтөрдө. Кыргыттар ыллаан эйээрдилэр, үҥкүүлээн тэйдилэр, хоһоон аахтылар. Үһүс түһүмэххэ «Дюлэн» (илии тутуутун күрэҕэ, тигии маастарыстыбата) иис дьоҕурун тургутан, уон мүнүүтэ иһигэр бары иилэ-саҕала тутан, дьэрэкээн оһуору тигэн таһаардылар. Төрдүс түһүмэххэ «Адымичэ Гуварча» (ыйытыыга хоруйдааһын) кыргыттар айылҕаҕа, туундараҕа сыһыаннаах боппуруостарга эппиэттээн ырыттылар. Бэһис түһүмэххэ аныгы олоххо эбэҥкилии оһуору хайдах киллэриэххэ сөбүн көрдөрөн, ураты көстүүлээх оскуола таҥастарын муодалаатылар.
Асчыт дьоҕурун тургутар алтыс «Одёмни» түһүмэххэ кыргыттар тоҥ балыгынан эбэҥкилии салаат оҥоруутугар күрэстэстилэр. Ким хайдах сатыырынан специялаан, сиэдэрэйдик тардан дьүүллүүр сүбэҕэ ууннулар. Сэттис, бүтэһик түһүмэххэ, кыргыттар мааны былааччыйаларыгар эбэҥкилии оҕуруолары, оһуордары симэнэн, лыах курдук эргичийэн, кыталыктыы кынталдьыйан хаамыылара — киэһэни өссө киэргэттэ.
Долгутуулаах түмүк
Биһиги мааны кыргыттарбыт «кыыс оҕо — күн айбыт, анаабыт оҕото» буоларын чаҕылхайдык дакаастаатылар. Дьүүллүүр сүбэ быһаарыытынан анал ааттар маннык үллэһилиннилэр:
«Нёрали» (Хорсун санаатын иһин) — Алдаана Винокурова (Сааскылаах, 7 кл.);
«Сэвден хосинкан» (Мичээрдээх сулус) — Сандаара Фадеева (Гимназия, 9 кл.);
«Амтыл Олёнин» (Бастыҥ иистэнньэҥ) — Леона Туприна (Үрүҥ Хайа, 10 кл.);
«Эне бираканин» (Төрүт тыл уонна үгэс харысхала) — Домна Спиридонова (Сааскылаах, 10 кл.);
Гран-при «Гудэйко асаткан» уонна «Аявуна» (Көрөөччүлэр биһирэбиллэрэ) — Алена Коркина (Сааскылаах, 10 кл.).
Кыайыылаахха эбэҥкилии симэммит мааны корона кэтэртилэр, хас биирдии кыттааччы күндү бириистэринэн уонна лиэнтэлэринэн наҕараадаланнылар.
Тэрээһини Мичийэ Дьяконова, Кэрэҕэ үөрэтэр оскуола үөрэнээччилэрэ, «Анаабыр алмаастара» үҥкүү ансаамбыла, Туяра Попова уонна «Гудэйко» оҕо ансаамбыла бэйэлэрин чаҕылхай нүөмэрдэринэн киэргэттилэр.
Кэрэҕэ үөрэтэр оскуола дириэктэрэ Мария Васильевна кэллиэгэлэригэр, төрөппүттэргэ, нэһилиэк баһылыгар Алексей Николаевка, Чэмэлиинэ Соктоеваҕа, култуура начальнигар Василиса Спиридоноваҕа уонна спонсор буолбут урбаанньыттарга: Тамара Андрееваҕа, Елена Васильеваҕа, Ирина Лыткинаҕа, Ньургуяна Григорьеваҕа истиҥ махталын тиэрдэр.
Маннык эбэҥкилии тыыннаах, дириҥ ис хоһоонноох тэрээһини улууспут иһигэр бастакытын оҕону кэрэҕэ үөрэтэр оскуолата тэрийэн ыытта. Оҕолорбут бэлэмнэрэ, таҥастарын кэрэтэ — Анаабырбыт кэскилэ бигэтин, үгэспит өлбөт-сүппэт күүстээҕин өссө төгүл дакаастаата.