Ааспыт сыл сэтинньи 28 күнүгэр, Арассыыйа үрдүнэн Ийэлэр күннэрин бэлиэтиир кэрэ-бэлиэ кэмҥэ, Саха Сирин Бырабыыталыстыбатын дьиэтигэр үрдүк таһымнаах тэрээһин буолан ааспыта. Онно Ил Дархан Айсен Николаев элбэх оҕолоох ийэлэргэ судаарыстыбаннай наҕараадалары үөрүүлээх быһыыга-майгыга туттарбыта. Бу үрдүк наҕараадаҕа — иккис истиэпэннээх «Ийэ албан аата» уордьаҥҥа — биһиги биир дойдулаахпыт, билигин уон оҕо мааны ийэтэ Лира Вальеревна Индеева.
Билигин судаарыстыба өттүттэн элбэх оҕолоох дьиэ кэргэттэргэ өйөбүл уонна көмө күүстээх. Ол эрээри, хас биирдии ийэ билэр: элбэх оҕону иитэн-аһатан, атахтарыгар туруоруу — бу ийэ киһиттэн улахан тулуурдуун, тапталлыын таһынан эппиэтинэһи ирдиир дьиҥнээх хорсун быһыы буолар. Лира Вальеревна бу үрдүк ааты чиэстээхтик сүгэ сылдьар.
Лира Индеева 1988 сыллаахха атырдьах ыйын 14 күнүгэр Анаабыр улууһун Үрүҥ Хайа нэһилиэгэр Евгения уонна Валерий Туприннар дьиэ кэргэннэригэр бастакы оҕонон күн сирин көрбүтэ. Оҕо сааһа, оскуолата төрөөбүт дойдутун кытылыгар ааспыта. Саха дьахтарын сиэринэн, кини кыратыттан үлэни-хамнаһы кыайа тутарга, дьиэ кэргэн сыаннастарын ытыктыырга иитиллибитэ.
2006 сыллаахха бастакы кэргэнин Андросов Дмитрийдыын көрсөн, ыал буолан, түөрт оҕоломмуттара. Хас биирдии оҕо бэйэтэ туспа суоллаах, ситиһиилээх:
Бастакы уол (2007 с.т.) — Лев билигин АГАТУ устудьуона, юрист идэтин баһылыы сылдьар. Дьиэ кэргэн эрэллээх тирэҕэ, бырааттарыгар, балталарыгар үтүө холобур буолар.
Иккис уол (2009 с.т.) — Максим дьиҥнээх спортсмен. Кини ситиһиилэрэ аан дойду таһымыгар тахсыбыттара. Элбэх мэтээл кавалера, дойдутун аатын спорт эйгэтигэр чиэстээхтик көмүскүүр.
Үһүс оҕо, кыыс (2012 с.т.) — Азалия Дьокуускай куорат 19 нүөмэрдээх биир бастыҥ оскуолатын үөрэнээччитэ. Ийэтин көмөлөһөөччүтэ, кэрэни кэрэхсиир мааны кыыс.
Төрдүс уол (2015 с.т.) — Андрей Уус Алдан улууһун Бэйдиҥэ нэһилиэгин спорт оскуолатыгар үөрэнэр. Убайын суолун батыһан, спортка бастакы хардыыларын ситиһиилээхтик оҥорор.
2017 сыллаахха бастакы дьиэ кэргэнигэр ыарахаттар үөскээн, арахсарга быһаарыммыттарын кэннэ, 2018 сылга Лира Вальеревна ийэтин балыыһаҕа көрдөрө Дьокуускайга кэлэ сылдьан, олоҕун иккис аргыһын – Лиэнскэй куораттан сылдьар Индеев Николайы көрсөр. Кинилэр сүрэхтэрин бииргэ холбоон, саҥа дэргиэттиин дьоллоох олоҕу айан, иккис дьиэ кэргэннэрин олус табыллыбыт сирдэринэн ааҕабыт. Кэргэнэ чааһынай урбаанньыт, дьиэ тутуутунан дьарыктанар.
Бу дьоллоох союһу үрдүктэн күүскэ өйөөбүттэрин курдук, билигин Лира уонна Николай алта оҕону төрөтөн, дьоллоох дьиэ кэргэни олохтоон олороллор. Кинилэр барыта уон оҕону иитэн таһаарар үтүө холобур буолан эрэллэр.
Бастакы оҕо — Михаил (2019 с. ахсынньы 31 к.т.) – Саҥа дьыл иннинэ Үөһээттэн бэлэхтээбит курдук дьоллоох күҥҥэ төрөөбүтэ.
Иккис Тимирлан (2022 с.т.) – Дьиэ кэргэн үөрүүтүн өссө улаатыннарбыта.
Иигирэ Аня уонна Арина (2024 с.т.) – Икки төгүл үөрүүнү бэлэхтээбиттэрэ.
Иигирэ уол уонна кыыс (2026 с.т.) – Ким да күүппэтэх дьоллоох түгэн буолбута! Кэнни-кэнниттэн иигирэ оҕо төрөөһүнэ — бу дьиҥнээх аптаах түгэн. Киһи соһуйуох да, сөҕүөх да курдук, бу хоруоналыы иигирэ (королевские двойни) Индеевтэр дьиэ кэргэннэрин өссө байыппыттара.
Дьороҕо үрдүк наҕарааданы ылбыт кэмигэр аҕыс оҕолоох Лира Вальеревна бүгүҥҥү күҥҥэ уон оҕо тапталлаах ийэтэ буолан, дьиҥнээх Дьоруой ийэ үтүө аатын өссө чиэстээхтик сүгэр.
Элбэх оҕолоох ийэҕэ — Лира Вальеревнаҕа — өссө да кытаанах доруобуйаны, оҕолорун ситиһиилэриттэн куруук үөрэ-көтө сылдьарын баҕарабыыт! Ийэ албан аата мэлдьи үрдүктүк тутулуннун!Лира Вальеревна этэринэн, доруобуйа уйар буоллаҕына, элбэх оҕолонуу — ол дьиҥнээх дьол. Хас биирдии оҕо төрөөтөҕүн аайы дьиэ иһэ үөрүүгэ тиллэр, олох саҥа кэрчикэ тахсар.
Мария Яроева