Олунньу 19 күнүгэр Үрүҥ Хайа нэһилиэгин «Хэйро» култуура киинигэр ураты истиҥ, айымньылаах эйгэ олохсуйда. Анаабыр улууһа тэриллибитэ 95 сыллаах үбүлүөйүгэр уонна Саха сирин биллиилээх судаарыстыбаннай, бэлиитичэскэй диэйэтэлэ Н.Е. Андросов төрөөбүтэ 90 сылыгар анаммыт «Култууралар уонна норуоттар сомоҕолоһуулара» диэн Сааскылаах нэһилиэгин айар кэлэктииптэрин кэнсиэрэ үрдүк таһымнаахтык буолан ааста.
Бу тэрээһин — икки нэһилиэк икки ардыгар быстыбат ситими, духуобунай баайы уонна нэһилиэктэр доҕордоһууларын туоһута буолла. «Алмаас» култуура киинин артыыстара үөрүүлээх быһыыга-майгыга Анаабыр улууһа 95 сыллаах, оттон Үрүҥ Хайа нэһилиэгэ 85 сыллаах үбүлүөйдээх сылларынан итиитик эҕэрдэлээтилэр. Култуура эстафетатын туоһу бэлиэтин уонна сэмэй бэлэхтэрин «Хэйро» киин директорыгар Сергей Васильевич Сыроватскайга үөрүүлээхтик туттардылар.
Кэнсиэр бырааһынньыктаах тыыннаах «Култуурабыт үлэһитэ» диэн идэтийбит үлэһиттэр гимн кэриэтэ ырыаларынан арылынна. Көрөөччүлэр төрөөбүт дойдуларын остуоруйатын кылгастык билсэн, Анаабыр улууһа хайдах тэриллибитин туһунан иһиттилэр.
Сценаны талааннаах ырыаһыттар баһылаатылар:
Үрүҥ Хайа төрүт олохтооҕо Константин Туприн «Кыһыҥҥы киэһэ» ырыатынан тымныы киэһэни ириэрдэ.
Култуура эйгэтин бэтэрээннэрэ, үтүөлээх үлэһиттэр Мария Попова уонна Гавриил Толбонов «Сардаана» диэн нарын ырыаны олус истиҥник дуэттаан толордулар.
Евдокия Дохунаева «Сардаана сибэкки» ырыата кэрэ куолаһынан көрөөччү сүрэҕин манньытта.
Гавриил Толбонов гитара тыаһыгар «Бу кэрэ киэһэҕэ» диэн лирическэй айымньыны толорон, истиҥ иэйиини үөскэттэ.
Афанасея Туприна «Эйиигинэ суох» диэн ырыатын кэннэ дохсун ытыс тыаһа өрө тыаһаата.
Лира Кылтасова «Таптал диэн тугуй?» диэн таайтарыылаах ырыата киэһэни өссө киэргэттэ.
Мария Попова толоруутугар дьукаагырдыы «Лабунмэдэну» ырыа хотугу сир ураты тыынын тиэрдэн, барыбытын төрүт култуурабытыгар сирдээтэ.
Улууспут киэн туттуута, Аан дойдуга тиийэ аатырбыт «Анаабыр алмаастара» образцовай үҥкүү ансаамбыла бу да сырыыга көрөөччүлэри сөхтөрдө. Кинилэр «Сааскылаах угуйар уоттара» уонна «Күнү көрсүү» диэн чаҕылхай композициялара эдэр саас эрчимин, хотугу айылҕа кэрэтин көрдөрдүлэр.
Ырыа-үҥкүү быыһыгар «Дьиэ иһинээҕи кэпсэтии» диэн көрдөөх-күлүүлээх сыаҥка туруоруллан, көрөөччүлэри дуоһуйа күллэрдэ, өрө көтөҕүллүүлээх кэпсэтиини тарта.
Артыыстар толорууларыгар өссө да атын кэрэ — нарын ырыалар, эдэр эрчимнээх үҥкүүлэр толоруннулар.
Бу дьоро киэһэ «Култуура эстафетата» салҕанар диэн биллэриинэн түмүктэннэ. Олунньу 24 күнүгэр Сааскылаах олохтоохторо Үрүҥ-Хайа айар куттаах дьонун кэтэһэбит диэн эттилэр.
Култуура — норуот дууһата. Бу курдук айымньылаах көрсүһүүлэр биһигини өссө күүскэ сомоҕолууллар, инникигэ эрэли уонна төрөөбүт дойдуга тапталы үөскэтэллэр!
Яроева Мария