Кулун тутар 7 күнүгэр, сааскы сырдык бырааһынньык иннинэ, «Алмаас» култуура киинэ дьону-сэргэни түмэн, икки чаатсан турар сүрэххэ дьэҥкик, дууһаҕа иһирэх тэрээһиннэри бэлэхтээтэ.
Тэрээһин бастакы чааһа норуот тапталлаах салайааччыта, ытыктабыллаах киһи Николай Егорович Андросов 90 сааһыгар анаммыт «Ахтан санаан ааһыахха» диэн ахтыы киэһэтинэн саҕаланна. Бу күн Николай Егоровичтыын үгүс сылларга илии тутуһан үлэлэспит үтүө дьон — биһиги Далбар хотуннарбыт — мустан, урукку кэмнэри ахтыбыттара.
Хас биирдии тыл, хас биирдии ахтыы Николай Егорович салайааччы быһыытынан киэҥ холбооһуннааҕын, киһи быһыытынан сымнаҕас майгылааҕын, муударай санаалааҕын, ирдэбиллээх эрээри, дьоҥҥо олус истиҥ сыһыаннааҕын өссө төгүл чаҕылхайдык арыйда. Бу кэмҥэ саала иһигэр ааспыт сыллар тыына кэлэн, дьону уоскулаҥнаах, өйдөбүнньүк иэйиигэ ыллартаата.
Ахтыы кэнниттэн «Сатабыллаах эбээлэр» диэн аҕа көлүөнэ дьону түмэр олус интэриэһинэй күрэх ыытылынна. Бу күн саала иһэ эбээлэр энергетикаларыттан, кинилэр эйэҕэс мичээрдэриттэн сандааран таҕыста. Күрэххэ кыттыбыт дьоруойдарбыт түөрт түһүмэҕи ааһан, бэйэлэрин дьоҕурдарын киэҥник арыйдылар:
Бэйэни билиһиннэрии: Хас биирдии эбээ олоҕун суолун, үтүө үгэһин сиэдэрэйдик кэпсээтэ.
Талаан таайыыта: Ырыа-тойук, үҥкүү-битии түһүмэҕэ — эбээлэрбит эрчимнэрэ киһини сөхтөрдө.
Дьарык-көрдөрүү: Ким тугунан дьарыктанарын, тугу сатыырын ып-ыраастык көрдөрдүлэр.
Авангард муода: Бу саамай күүтүүлээх, дьикти түгэн этэ. Хайдах курдук айар дьоҕурдаахтарын, саҥаны арыйар дьоҕурдаахтарын кинилэр таҥастара-саптара туоһулаата.
Күрэх түмүгүнэн, хас биирдии эбээ ураты ааттарынан бэлиэтэннэ:
«Аламай эбээ» — Спиридонова Наталья Алексеевна
«Нарын эбээ» — Большакова Лена Хрисанфовна
«Уран эбээ» — Чуприна Виктория Константиновна
«Далбар эбээ» — Баданина Анна Ивановна
«Көхтөөх эбээ» — Спиридонова Варвара Степановна
«Сатабыллаах эбээ» — Баданина Анна Ивановна
Бу күн эбээлэрбит эдэр саастарын санатарынан, олоххо дьулуурдарын, кэрэни кэрэхсиир санааларын көрдөрдүлэр. Кинилэр — биһиги дьиэ кэргэнмит, олохпут бигэ тирэхтэрэ. «Алмаас» култуура киинэ бу тэрээһининэн сааскы бырааһынньык иннинэ дьоҥҥо-сэргэҕэ күүс-уох, үтүө санааны эбии бэлэхтээтэ.
Яроева Мария