Сэтинньи 1 күнүгэр «Алмаас» култуура киинигэр Сааскылаахха олорор араас омук түмсүүтэ уратытын, култууратын билиһиннэрэр дьоро киэһэтэ буолла. Хас биирдии национальнай түмсүү төрүт аһын амсатта, үҥкүүтүн, ырыатын көрдөрдө.
Тыйыс айылҕалаах Сааскылаах нэһилиэгэр уопсайа уон араас омук эйэ-дэмнээхтик олорор. Хас биирдии норуот бэйэтэ туһунан астаах-үөллээх, уус-уран айымньылаах, остуоруйалаах, оонньуулаах, таҥастаах-саптаах.
Кэнсиэргэ кэрэни кэрэхсиир, ырыаны сөбүлүүр биир дойдулаахтарбыт муһуннулар. Киэһэни Жанна Сусановна уонна Максим Осипов иилээн-саҕалаан ыыттылар. Бастаан Арассыыйа өрөгөй ырыата дьиэрэйдэ, салгыы эҕэрдэ тылы улуус баһылыгын социальнай боппуруостарга солбуйааччыта Николай Андреев эттэ. Ол кэннэ эбэҥки, долган уонна саха норуоттара эҕэрдэ кэнсиэртэрин көрдөрдүлэр. Эбэн эттэххэ, таҥастара кэрэтин, араас өҥнөөх оҕуруонан тиһиллибит киэргэллэрин көрөн киһи эрэ хараҕа сымныыр.
Биэчэр устата элбэх ырыа саха, эбээн, долган тылынан ылланна. Араас хамнаныылаах үҥкүү, тойук толорулунна. Көрөөччүлэри омуктар төрүт бүлүүдэлэринэн күндүлээтилэр.
Бу тэрээһин нэһилиэк олохтоохторун биир санааҕа түмэн, дойдуга тапталы, норуоттар доҕордоһууларын күүһүртэ.
Мария Яроева