Атырдьах ыйын 10 күнүгэр Сааскылаах нэһилиэгэр аҕыйах ахсааннаах норуоттар күнүн бэлиэтээтилэр. Тэрээһин сынньалаҥ уонна култуура пааркатыгар буолан аста.
Бастаан мустубут дьон эбэҥки норуотун үгэһинэн Чычыпкаан нөҥүө хобо чуораан охсон, болбукта буруотунан ыраастанан сэргэлэр түһүлгэлэригэр тиийэн Айыы алгыһын ылыннылар. Алгыс сиэрин-туомун алгысчыт, Саха Өрөспүүбүлүкэтин култууратын туйгуна Көстөкүүн Андуруоһап ыытта.
Бырааһынньык үөрүүлээх чааһыгар улуус баһылыгын солбуйааччыта Николай Андреев истиҥ эҕэрдэтин тиэрдэн туран, Аан дойду үрдүнэн бэлиэтэнэр аҕыйах ахсааннаах көс олохтоох төрүт норуоттар күннэрэ омуктар төрүт үгэстэрин, култуураларын, ийэ тылларын умнубакка, норуот быһыытынан сокуонунан көмүскэллээх буоларын туһугар, тулалыыр эйгэни харыстаан, кэлэр көлүөнэлэр сүтэрбэккэ үйэтитэ туралларын туһугар олохтоммут Күн буоларын тоһоҕолоон бэлиэтээтэ. Уонна 2022 сылтан 2032 сылга аҕыйах ахсааннаах норуоттарга 10 сыллаах дьаһал ыытылла турарын бэлиэтээтэ.
Ол кэннэ быйыл сайын өрөспүүблүкэ таһымыгар ыытыллыбыт ыһыахтарга Анаабыр делегацията, улуус аатын бэркэ ааттаппыт ойуу-бичик оһуордаах дьэрэкээн быыстапкалары туруорбут уран тарбахтаах маастардарга Виктория Николаеваҕа, Елена Поповаҕа уонна айылҕаттан айдарыылаах, талааннаах худуоһунньукка Спиридон Поповка анал бириистэри туттартаата. Онтон эҕэрдэ тылын эттэ Сааскылаах нэһилиэгин баһылыга Алексей Николаев.
Манна араас тэрээһиннэр буоллулар, ыалдьытымсах түһүлгэ күрэҕэр үс түһүлгэ кыттыыны ылла, кыттааччылар сирдэрин наһаа үчүгэйдик киэргэппиттэр, ыалдьыттары минньигэс аһынан күндүлээтилэр. Култуурунай программа кэмигэр сценаҕа ыллаатылар култуура үлэһиттэрэ, национальнай таҥаһы көрүү куонкуруһа буолан ааста. Кыайыылаахтарга харчылаах сертификаттары туттардылар. Бириистэри туруорда «Алмаз» култуура киинэ уонна Сааскылаах нэһилиэгин администрацията. Култуурунай программаны интэриэһинэйдик тэрийэн ыытта СӨ култуура үтүөлээх үлэһитэ Мария Попова. Быйылгы тэрээһин Россияҕа дьиэ кэргэн сылыгар уонна Саха сирин Оҕо саас сылыгар ананна.
