«Бары бииргэ Кыайыыга» девизтээх «Кыайыы Знамята» эстэпиэтэ кулун тутар 26 күнүгэр Анаабыр улууһугар тиийдэ. Үөрүүлээх тэрээһини Сааскылаах олохтоохторо “Алмаас” култуура киинигэр көрүстүлэр.
Аҕа дойду Улуу сэриитигэр Кыайыы 80 сылыгар аналлаах “Кыайыы Арктическай эстэпиэтэтэ” бу иннинэ, кулун тутар 24 күнүгэр, Чукотка бэрэстэбиитэллэрэ Аллараа Халыма оройуонун баһылыгар Ярослав Бандеровка уонна Черский олохтоохторугар туттарбыттара. Салгыы Черскэйтан Дьокуускай куоракка самолетунан ыытан, аҕыйах ахсааннаах норуоттар ассоциацияларын көрсүһүүтүгэр Анаабыр улууһун баһылыгар туттарбыттара.
Кулун тутар 26 күнүгэр Арктика регионнарыгар ыытыллар эстэпиэтэ чэрчитинэн Кыайыы знамятын Сааскылаахха үөрүүлээх быһыыга-майгыга көрүстүбүт.
Саала иһигэр ытык кырдьаҕастары кытта кэнчээри ыччат тоҕуоруһа муһунна. Улуу Кыайыы бэлиэтин хас биирдии мустубут киһи долгуйа көрүстүлэр. Знамяны оскуола үөрэнээччилэрэ Максим Осипов хамаандатынан үөһээ күөрэччи тутан арыаллаан аҕаллылар. Тэрээһин үөрүүлээх чааһыгар эҕэрдэ тылы улууспут баһылыга Эдуард Платонов, Ямало-Ненецкай автономнай уокурук норуоттар икки ардыларынааҕы бииргэ үлэлээһин отделын начаалынньыга, төрүт олохтоох аҕыйах ахсааннаах норуоттар дьыалаларыгар департаменын начаалынньыга Павел Ланов уонна хоту дойду норуоттарын дьыалаларын начаалынньыга Аркадий Диодоров эттилэр.
Тэрээһин кыттыылаахтара Аҕа дойду Улуу сэриитин сылларыгар Хотугу норуоттар фроҥҥа төһө кыалларынан көмөлөспүттэрин: этинэн, балыгынан, түүлээҕинэн, фроҥҥа үбү-харчыны хомуйбуттарын бэлиэтээтилэр.
Биһиги хотугу эргимтэҕэ сытар Анаабырбыт дьоно-сэргэтэ төһө да сэриигэ ыҥырыллан саа-саадах тутан кыргыспатахтарын иһин, кыайыы туһугар эдэр-чэгиэн саастарыгар үлэни баҕас үлэлээбиттэрэ. Утуйар ууну да умнан, хараҥа түүннэртэн, улуйар буурҕалартан, бытарҕан тымныылартан толлубакка иитэр табаны энчирэппэккэ, кыһыннары-сайыннары сынньанары билбэккэ үрүҥ кырсаны сонордоһон, сылаас таҥаһы тигэн фроҥҥа атааран уонна да атын ыарахан үлэни ураты хоһууннук, хорсуннук үлэлээн олорбуттара.
Ол курдук оборона пуондатыгар 5858 устуука итии таҥас, харчынан уонна облигацияларынан 264.980 солкуобай үп хомуллан ыытыллыбыта. “Сэбиэскэй Саха сирэ” танковай колоннаны тутууга 196.007 солкуобай бэриллибитэ. Кыһыл Армия буойуннарыгар 28414 солкуобай сууммалаах баһыылка ыытыллыбыта. Байыаннай сулууспалаахтар кэргэттэригэр анаан 4917 солкуобайдаах материальнай көмө оҥоһуллубута. Ити аҕыйах үлэһит илиилээх оройуон холугар улахан көмө этэ. Оччотооҕута оройуоҥҥа оҕолуун-уруулуун 1800 эрэ киһи олороро.
Тэрээһин Аҕа дойду Улуу сэриитин сылларыгар табаһыттар- транспортнай батальон туһунан документальнай краткометражнай киинэ көрдөрдүүтүнэн түмүктэннэ.
Салгыы өйтөн түспэт бэлиэ түгэни историяҕа тиһэн, өйдүү-саныы сылдьар гына хаартыскаҕа түһэн, Кыайыы Кыһыл Знамятын көрсүү сэргэх тэрээһинэ өрө көтөҕүллүүлээхтик түмүктэннэ.
Кыайыы знамята салгыы Үрүҥ Хайа нэһилиэгэр айаннаата, онтон Таймылыырга тиийэн суолун түмүктүөҕэ.
Кырдьаҕас көлүөнэлэр икки тиллэр икки ардынан кыргыһыыта, үлэтэ-хамнаһа эдэр ыччакка өлбөт-сүппэт өйдөбүнньүк буолуоҕа.
Улуу Кыайыы 80 сылыгар аналлаах тэрээһин Арассыыйа табаһыттарын национальнай сойууһун көҕүлээһининэн ыытыллар. Кулун тутар 17 күнүгэр Чукоткаҕа саҕаламмыт эстафета муус устар 16 күнүгэр Ямалга түөрт Арктическай улуустары (Чукотскай автономнай уокурук, Саха Өрөспүүбүлүкэтэ, Красноярскай кыраай (Таймыыр Долгано-Ненецкэй муниципальнай оройуон уонна Ямало-Ненецкэй автономнай уокуруга) ааһан түмүктэниэхтээх, — диэн СӨ Бырабыыталыстыбатын Бэрэссэдээтэлин солбуйааччы Ольга Балабкина бэлиэтээтэ.