Бу күннэргэ Сааскылаах нэһилиэгэр Н.Е. Андросов аатынан искибиэргэ турар суут бириистэптэрин сулууспата уонна оройуоннааҕы суут улуус 95 сыллаах үбүлүөйүгэр анаан бэлэхтээбит ыскамыайкаларын вандаллар киртиппиттэр, үрдүгэр силлээбиттэр. Бу дьон үлэтин уонна төрөөбүт улууһу күндүтүк санаан оҥоһуллубут бэлэҕи харыстаабат буолуу, куһаҕан, ньэгэй быһыы буолар!
Ыскамыайканы оҥорууга, туруорууга элбэх киһи үлэлээбитэ биллэр. Ол үлэни сыаналаабат, алдьатар-кээһэтэр эрэ санаалаах дьон дьайыытыттан тулалыыр эйгэҕэ хоромньу тахсар. Тустаах искибиэр – нэһилиэк, улуус олохтоохторо, ыалдьыттара сынньанар, күүлэйдиир сирдэрэ. Бу буолбут вандализм күүлэйдиир сир тас көрүҥүн эрэ буорту оҥорбот, олохтоох дьон санаатын эмиэ түһэрэр.
Вандализм – сүрүннээн ыччаттан тахсар быһыы. Манна киһи тугу эрэ алдьатара, киртитэрэ, тоҕута сынньара, атын киһи баайын-дуолун, малын-салын буорту оҥороро киирсэр.
Бу куһаҕан быһыыны тохтоторго эдэрдэри иитиигэ улахан болҕомто ууруллара ирдэнэр. Дьон үлэтин харыстыырга, тулалыыр эйгэни ыраастык тутарга ыҥырабыт!
Мария Яроева