2026 сылга “Ыраас Арктика” федеральнай бырайыагынан Арктика сиригэр-уотугар быраҕыллыбыт хаарбах тимири, бөҕү-сыыһы ыраастааһын үлэтэ салҕанар.
Бырайыак чэрчитинэн, үлэ быйыл от ыйыттан балаҕан ыйыгар диэри Анаабырга, Аллайыахаҕа, Булуҥҥа, Дьааҥыга, Аллараа Халымаҕа, Усуйаанаҕа ыытыллара былааннанар. Чопчу болдьоҕу ыам ыйыгар буолар “Ыраас Арктика” федеральнай ыстаап уонна Саха сирин арктическай улуустара кыттыылаах оробуочай мунньахха быһаарыахтара диэн СӨ Ил Дарханын уонна Бырабыыталыстыбатын пресс-сулууспата иһитиннэрэн турар.
Санатан эттэххэ, федеральнай бырайыак 2021 сыллаахха Булуҥ оройуонугар Тиксииттэн саҕаламмыта. Өрөспүүбүлүкэ Арктическай зонатын алта улууһугар 2025 сыллаахха 400 туоннаттан тахса хаарбах тимир уонна да атын бөх-сыыс хомуллубут. Онтон уопсайа биэс сыл устатыгар волонтердар икки тыһыынча туонна хаарбах тимири хомуйбуттар, уопсайа 48 гектартан тахса сир ыраастаммыт.
“Ыраас Арктика” федеральнай бырайыак РФ Бэрэсидьиэнэ Владимир Путин көҕүлээһининэн олоххо киллэриллибит “Экологическай чэгиэн-чэбдик буолуу” национальнай бырайыак соругун толорор.