Үрүҥ-Хайа оскуолатыгар Аҕа дойду Дьоруойун күнүн чэрчитинэн, улахан кылаас оҕолоругар анаан дьоһун тэрээһин буолан ааста.
«Ким да умнуллубат, туох да умнуллубат» темаҕа 9 кылаас үөрэнээччитэ Леона Туприна Советскай Сойуус Дьоруойун Федор Охлопков туһунан кэпсээтэ. Дьоруой Анаабырга 1966 сыллаахха кэлбитин туоһулуур хаартыскалары көрдөрдө, кырдьык да дьоруой биһиги дойдубутугар кэлэ сылдьыбыт эбит. Үгүс билэр дьоммут дьоруойдуун хаартыскаҕа түспүттэрэ мэктиэлэммит. Биллэр табаһыттар Туприн С. И., Туприн А. И. оччолорго олох эдэр дьоннор. Дьоруой олоҕун туһунан элбэҕи биллибит-иһиттибит.
Тэрээһиҥҥэ анал байыаннай дьайыы кыттыылааҕа Савва Спиридонов оҕолору кытта көрүстэ. Байыаннай дьайыы туһунан кэпсээбитин оҕолор бэрт сэҥээрдилэр, бэл иккис кылаас мэник-тэник оҕолоро сэҥээрэн иһиттилэр. Савва 18 сааһын туолаат да армияҕа баран 2 сыл сулууспалаан кэлбитэ. Оччолорго, 1996 сыллаахха, ыһыллыы, тоҕуллуу кэмэ этэ, аны Чечня сэриитэ буола турара. Хата хайдах эрэ ону муччу көтөн кэлбит эбит.
Этэҥҥэ сылдьыҥ, дойдубутун көмүскүү сылдьар хоһуун уолаттарбыт!
Көрсүһүүнү тэрийэн ыыппыт эдэр кэллиэгэлэрбэр Ася Катановаҕа уонна Яна Яковлевага махталбын тиэрдэбин.
Надежда Туприна, Үрүҥ Хайа оскуолатын социальнай педагога