«Сверкай алмазами, Победа» бэстибээл-күрэх сэтинньи 15 күнүгэр бүтэһик иннинээҕи кэнсиэрэ үрдүк таһымнаахтык буолан ааста. Бу Кыайыы 80 сылыгар анаммыт тэрилтэлэр икки ардыларынааҕы тэрээһин.
Бу сырыыга нэһилиэнньэ уонна үлэ социальнай көмүскэлин управлениетын, дьиэ-уот, коммунальнай хаһаайыстыбатын, биэнсийэ уонна социальнай страховкалааһын пуондатын үлэһиттэрэ уонна Н. Е. Андросов аатынан элбэх хайысхалаах унитарнай тэрилтэ исписэлиистэрэ кытыннылар.
Кэнсиэр устата фойеҕа ас-үөл уонна атын табаар дьаарбаҥката тэрилиннэ.
Бэстибээл тэрилтэлэр билиһиннэриилэриттэн саҕаланна. Дьону долгуппут түгэнинэн «Тиһэх чуумпу мүнүүтэлэрэ» диэн олус итэҕэтиилээх көрдөрүү буолла. Салгыы кэрэ аҥардар ансаамбыллара «Күн киириитэ кытархай» диэн ырыаны толордо. Уолаттар уонна эр дьон бөлөҕө эрчимнээх «Саллаат суола» үҥкүүнэн көрөөччүлэр биһирэбилин ыллылар. «Кыайыыны аҕалбыттар» хоһоону Сергей Винокуров дорҕоонноохтук аахта. Роман Слепцов «Дойдубар» ырыаны бэртээхэйдик ыллаан иһитиннэрдэ. Салгыы «Күөх былаат» үҥкүүнү пааранан тахсан үҥкүүлээтилэр. «Дьылҕа хаан үс муннуктара» театрализованнай дьүһүйүүгэ саллааттар дьиэ кэргэттэрин кытары сэриигэ сылдьан суруйсуулара көһүннэ.
Маны тэҥэ, сылааһынан хааччыйар тэрилтэ эр дьоно «Хотугу хотойдор» ырыаны толорууларыгар күөх экраҥҥа биир дойдулаахтарбыт байыаннай дьайыыга сылдьан тиһэх түспүт хаартыскаларын көрдөрөн, хорсуннуу охтубуттарын кэриэстээтилэр. Салгыы хомус аргыстаах Константин Винокуров тойуктаата. Уолаттар толорууларыгар «Вперед, Россия» ырыа ылланна. Бүтэһик нүөмэринэн кыттааччылар бары тахсан «Улуу Кыайыы күнэ» толордулар. Түмүккэ култуура үлэһиттэригэр тэрээһини көҕүлээн ыыппыттарын иһин сэмэй бэлэх туттардылар.
Бу кэнсиэр Улуу Кыайыы 80 сылыгар анаммыт үгүс тэрээһиннэртэн биир чаҕылхай түгэн буолла. Кыттааччылар уонна көрөөччүлэр дууһаларын таарыйан, бэстибээл үрдүк суолтатын өссө күүһүртэ.
Мария Яроева