“Алмаас” култуура киинигэр Дьокуускай куораттан кэлэ сылдьар “Эдэр ыччат десана” олохтоохторго “Илмактал” ыччат култуурнай-спортивнай бэстибээл аһыллыытыгар аналлаах босхо кэнсиэри ыытта. Ону таһынан эдэр ыалларга республиканскай бырагырааманан дьиэ тутталларыгар эбэтэр дьиэ ылыналларыгар социальнай төлөбүрдээх сэртипикээттэри туттарыы буолла.
Ол курдук, кэнсиэри кылгас испэктээктэн саҕалаатылар. Испэктээк кэннэ, эдэр ыччат десанын салайааччытыгар, миниистир Петр Шамаевка тылы биэрдилэр:
“Эдэр ыччат десана хотугу улууска бастакы сырыыта. Махтанабын Анаабыр улууһун баһылыгар Эдуард Петровичка. Уонна бүгүн этэҥҥэ кэнсиэртээн баран, сарсын Үрүҥ Хайаҕа тэрээһин ыытар баҕа санаалаахпыт”, — диэн эттэ уонна эдэр ыалларга сэртипикээттэри туттарда. Ол курдук, сэртипикээттэри ыллылар Нехоруковтар дьиэ кэргэн, Платонова Сардаана дьиэ кэргэнэ, Пономорева Ньургуйаана дьиэ кэргэнэ, Коркиннар дьиэ кэргэн.
Анаабыр улууһун баһылыга Эдуард Платонов оройуон олохтоохторун, кэлбит ыалдьыттары кэлэн иһэр бырааһынньыгынан эҕэрдэлээтэ уонна 2023 сыллаахха Дьокуускай куоракка эдэр ыччат миниистирин кытта сөбүлэһэн, “Ыччат десанын” Анаабыр улууһугар ыҥырбытым диэн эттэ. Эдэр ыччат министиэристибэтин кытта эдэр ыччаты кытта күүскэ үлэлэһэ сылдьабыт, итиэннэ махтанан туран бары иннибит диэки хамныы, хамсана сылдьыаҕыҥ диэн туһаайан эттэ.
Ол кэннэ дьоллоох эдэр ыалларга сертификаттары туттартаата.
Сэртипикээт хаһаайыннара буоллулар Мироновтар, Васильевтар, Мордовская, Андросовтар, Тимофеевтар, Туприннар К.В. дьиэ кэргэн, Анисимова уонна Николаев дьиэ кэргэн, Куличкиннар, Спиридоновтар, Гайтукаевтар, Кылтасова, Туприннар А.А. дьиэ кэргэн, Москвитина дьиэ кэргэнэ. Уопсайа 18 эдэр дьиэ кэргэн сэртипикээти ылла.
Дьоро күн кэнсиэр биир тыынынан ааста. Ыччат араас аныгылыы хамнаныылаах үҥкүүлэри көрдөрдө, ыллаата — туойда. Көрөөччүлэри сүргэлэрин көтөҕөн оонньоттулар-хамсаттылар. Анаабыр улууһун эдэр ыччатын салайааччыта Туприна Сайаана гитаранан сахалыы ырыа ыллаан иһитиннэрдэ. Көрөөччүлэр ыһыытаан-хаһыытаан, эдэр ыччаты ытыстарын тыаһынан уруйдаатылар, оонньууларыгар көхтөөхтүк кыттан дуоһуйдулар. Кэнсиэр түмүктэниитигэр десант ыччата гитаранан устудьуоннар гимнын ыллаатылар.
Мария ЯРОЕВА