«Тугутчаан» оҕо уһуйааныгар Саха Өрөспүүбүлүкэтин үтүөлээх учуутала, СӨ үөрэҕириитин туйгуна, норуот маастара Алексеева Лидия Егоровна кэриэһигэр долган омук остуол оонньууларын маҥнайгы улуустааҕы күрэҕэ буолан ааста. Уопсайа үс уһуйаан күрэхтэстэ.
Ирдэбил быһыытынан үс бөлөхтөн иккилии хамаанда кытынна. Күрэх саастарынан араҕыста: 4-5 диэри уонна 6-7 диэри оҕолорго. Хас биирдии хамаанда үстүү кыттаачылаах: оҕо, төрөппүт уонна иитээччи. Оонньуу хаамыыта 3 хайысханан барда: тырыынка, пээрикээн уонна хаамыска. Хас биирдии оонньууга тус бириэмэ бэрилиннэ.
Тэрээһин 2016 сыллаахха аан маҥнай кэлэктиип иһинэн ыытыллыбыта. Онтон 2017 сыллаахха эбии оҕолору уонна төрөппүттэри уһуйан, хамаанда тэрийэн, оҕо уһуйаанын иһинэн күрэх оҥорбуттара. Күрэҕи үгэс оҥостон улуустааҕы таһымҥа быйыл таһаардылар.
Быйыл халлаан туругунан сибээстээн Үрүҥ Хайа хамаандата кэлбэтэҕэ. Кинилэр түмүктэрин интернет ситимин нөҥүө бэйэлэрэ оонньоон ыыппыттара. Ол барыта түмүк куоластааһынҥа учуоттаммыта.
Маҥнайгы түһүмэх түмүгүнэн 4-5 саастаах оҕолор икки ардыларыгар кыайыылааҕынан Сааскылаах нэһилиэгин «Тугутчаан» оҕо уһуйаанын «Дьүкээбил» хамаандата буолла.
Иккис түһүмэххэ 6-7 саастаах оҕолор икки ардыларыгар кыайыылааҕынан Сааскылаах нэһилиэгин «Чуораанчык» оҕо уһуйаанын «Хоһууннар» хамаандата ааттанна.
Үһүс түһүмэххэ кыайыылаахтар кииристилэр. Ол түмүгүнэн муҥутуур кыайыыны Сааскылаах нэһилиэгин «Тугутчаан» оҕо уһуйаанын «Дьүкээбил» хамаандата ситистэ.
Күрэх бүтүүтэ дьүүллүүр сүбэ чилиэнэ Любовь Васильевна, Алексеева Л.Е. кыра кыыһа, тыл эттэ:
— Наһаа үчүгэй долгутуулаах күрэх буолан ааста. Бу манна долгуйан тураммын, ийэм аатын үйэтитэр тэрээһин тэриллибититтэн олус үөрэбин. Оруобуна командировка кэмигэр бүгүн манна кэлэн көрбүппэр махтанабын!
Ыалдьыт үөрэх управлениетын начальнигар Любовь Дмитриевнаҕа уонна оҕо уһуйаанын иитээччилэригэр махтал суруктары туттартаата. Ийэтин Алексеева Л.Е. аатыттан анал бирииһи Василиса Андросоваҕа туттарда.
Бастакы улуус иһинээҕи күрэх түмүктэннэ. Дьоҕурдаахтан дьоҕурдаах, кытаанахтан кытаанах, күүстээхтэн күүстээх кыайда. Тэрийээччилэр остуол оонньууларын инникитин өрөспүүбүлүкэ таһымыгар таһаарар баҕа санаалаахтар.
Сардана Алексеева