Тохсунньу 23 күнүттэн саҕалаан Анаабыр улууһугар Дьокуускайтан кэлбит элбэх хайысхалаах оҕо биригээдэтэ үлэлиир. Быраастар дьоҕус биригээдэлэрэ кэлэн балтараа нэдиэлэ устата, оҕо аймах доруобуйатын туругун көрөллөр-истэллэр, сүбэ-ама биэрэллэр.
Кинилэр Сааскылаахха олунньу 4 күнүгэр диэри үлэлииллэр. Бу иннинэ Үрүҥ-Хайа нэһилиэгэр 5 күн устата уопсайа 203 оҕо доруобуйатын көрдүлэр. Бүгүҥҥү туругунан Сааскылаахха 177 оҕону көрдүлэр. Бу туһунан педиатр бырааһа Анжелика Иннокентьевна Матвеева билиһиннэрдэ:
— Биһиги доруобуйа уонна медицинскэй профилактика республикатааҕы общественнай кииниттэн ананан кэлбиппит. Ол иһигэр «Региональный центр детских мобильных бригад» диэн хайысхалаахпыт. Уопсайа биригээдэбит 13 киһиттэн турар — харах бырааһа, ЛОР, эндокринолог, кардиолог, гинеколог, уролог, ортопед, психиатр, педиатр, узист, невролог уонна икки орто медперсонал. 14-тэриттэн үөһээ саастаах оҕолортон гепатит анализтарын ылабыт уонна эндокринолог көрдөрүүтүнэн гормон анализтарын ылабыт.
Тохсунньу 23 күнүгэр Үрүҥ-Хайаҕа айаннаабыппыт, олохтоохтор үчүгэйдик көрсүбүттэрэ. Сэмэй, эйэҕэс дьоннордоох дойду эбит. Балыыһаҕа олорбуппут, сорох быраастарбыт уопсайга түспүттэрэ. 24 чыыһылаттан саҕалаан оскуоланнан уонна уһуйаанынан сылдьан үлэлээбиппит. Былааммытын сүүс быраһыан толордубут дии саныыбын, уопсайа Үрүҥ-Хайаҕа 203 оҕону көрдүбүт.
Онтон тохсунньу 28 күнүттэн Сааскылаахха тиийэн орто оскуола оҕолорун көрбүппүт, бүгүн гимназия оҕолорун көрө сылдьабыт. Сарсын, ол эбэтэр 31 чыыһылаҕа, бастакы нүөмэрдээх “Тугутчаан” уһуйаан оҕолорун көрүөхпүт. Салгыы олунньу 3 күнүттэн “Чуораанчык” уһуйаан оҕолорун көрөн саҕалыахпыт. Өрөбүл күннэргэ доруобуйаларынан хааччахтаах оҕолору көрүөхпүт.
Чинчийиигэ наадалаах бары тэрилинэн толору хааччыллыылаахпыт. Бүгүҥҥү туругунан 380 оҕо көрдөрүннэ. Оҕолор көрдөрөн бүтэр тумуктэригэр барыларыгар сүбэ-ама биэрэбит, эмп аныыбыт, наадыйар оҕону куорат балыаһаларыгар ыытабыт.
Элбэх хайысхалаах оҕо быраастарын биригээдэтэ Анаабыр улууһугар бу сылга бастакытын кэлэн үлэлиир. Бастатан туран, кинилэр доруобуйаларынан хааччахтаах уонна учуокка турар оҕолорго болҕомтолорун уураллар.